Inpek tharna ni atana hmang theuh turin sawm

Social Welfare Minister leh Tuikum bialtu MLA Er. Lalrinawma chuan Zirtirtute Ni chu chu khawtlang leh ram leh hnam tan inpek tharna ni atana hmang theuh turin Zirtirtute a sawm.
Nimin a Khumtung Post Matric Union ten Zirtirtute Ni 2023 lawmna Khumtung Community Hall-a an buatsaih a hmanpuina ah Tuikum bialtu MLA ni bawk Er. Lalrinawma chuan khawvelin mi zahawm an tih Zirtirtute puala ni bikah zirlai leh zirtirtu kalkhawmte chu chibai bukin, khawtlang leh ram leh hnam tan inpek tharna ni atan hmang theuh turin a sawm a. Kan ram nghahfak zirlaite zirtirna kawnga thawktu Zirtirtute chu fakawm a tih thu sawiin, Zirlaite chu ram leh hnam hmangaihna zirtir tam a tul tih a sawi a, mithiam leh thil tithei tak tak te pawhin ram leh hnam hmangaihna an neih loh chuan hmasawnna tithuanawp tu an ni thei tih hriat a tul hle a ni, a ti.

Minister Er. Lalrinawma chuan mahni mihringpuite hlutna hrechiang a, chenho pui thiam nih a tul thu sawiin, kan thil tih thin tam tak te hi mahni chanah indah thiam a, kan mawhphurhna leh tihtur kan hriat chian a, theihtawp chhuaha kan mawhphurna hlen theuh a tul thu kalkhawmte hmaah a sawi a. Kan tawngkam leh chetzia hian midangte hnenah thui takin thu a sawi thin tih a sawi bawk.

Ruihhlo thatloh zia pawh SW&TA Minister chuan sawiin, Mizo thalaite leh zirlaite run mektu ruihhlo do kawngah mi tinin mawhphurna kan nei tih a sawi a, “Tun dinhmunah in chhungkua a luhchilh lo a nih pawhin engtikah emaw chuan he ruihhlo hian a la luhchilh ve thei che u a ni tih hriain, a do kawngah theihtawp chhuahin i tang tlang ang u,” tiin kalkhawm te a sawm a ni.

Nimin-a he hun hmanna ah hian Khum-tung-a School hrang hrang zirtirtute leh VCP bakah MUP, MHIP, YMA aiawh ten thu an sawi a ni.