East Lungdar Zirna kum 100 tlin lawmna neih a ni
East Lungdar Thangburha Hall-a East Lungdar Zirna Centenary lawmna ah hian Education Minister chuan East Lungdar-in zirna an dahsang a, Centenary hial an lawm chu ropui a tih thu a sawi a, “Zirna dahsang khua hi engtik lai mahin an te ngai lovang,” tiin kumin a State Award to Teachers-ah he khuaa mi Lalengliana Chawnghlut thlan a ni chu phu hlea a hriat thu a sawi bawk.
Education Minister chuan UPSC-a Mizo thalaite an tlin mai theih loh chhan kan inzawt thin tih pawh sawiin, zirna-ah hian ram mamawh chhanna pe turin chhungkua leh khawtlang hian zirna hi No. 1-ah kan dah a ngai tih a sawi a. Mizoram sawrkarin zirna chu ngaih pawimawh ah a neih avangin sum harsa leh hripui karah zirtirtu 2700 chuang lak an ni tawh tih a sawi a. Mipuiten sawrkar an thlawp that avangin India ram State danga an tih theih loh Covid hripui len laiin kum 2020, 2021 leh 2022-ah te Board Exam hlawhtling takin Offline-a buatsaih a nih thu leh hei hian sawrkarin zirna a ngaih pawimawhzia leh Quality Education vawnthat a duhzia a lantir a ni, a ti bawk.
Minister Lalchhandama Ralte chuan zirlaite chu Lalpa tihna nen lehkha zir tura chahin, Zu leh ruihtheih thila inhmang lo tur leh mipat hmeichhiatna laka inthiarfihlim turin a chah bawk a. |hangthar ten he ram leh hnam hmangaihna an theih nan School-ah ‘Ro min relsak ang che’ tih hnam hla chu zah taka sa thin tura tih a nih thu leh, naupangten Mizo nunphung an hriat nan ‘Zonun’ tih chu zirlaibu-ah hman a nih thu a sawi a, mahni tawng ngeia Science leh Mathematics an zir theih nan Bilingual Textbook siam a nih thu te, naupang te zualte zirlaibu-ah ‘Zirtirh Bu’ leh ‘Nambar Bu’ te siam thar leh a nih thu leh Zirlaibu-a milem langte chu hnamdang hmel ni lovin Mizo hmel tihlan a nih thu te a sawi bawk.
East Lungdar Zirna Centenary Lawmna hi September 4, 2023 zan atang khan hman niin nizan thleng khan hun hman a ni a, hemi hun chhung hian Bazar Kawn-ah Centenary lungphun chu kum 101 mi Nuchhuni chuan a hawng a. Zirnaa mi hlawhtlingte, Zirnaa mi hmasate leh State Awadee to Teacher 2023 Lalengliana Chawnghlut hnenah chawimawina an hlan bawk. Nimin-a he hun hmanna ah hian School Education Minister hi School Education Department Addl. Director Lalhmachhuana leh Serchhip DEO Lallawmawma ten an tawiawm a. Sikul naupang leh zirtirtute, khawtlang hruaitute, he khuaa sawrkar hnathawk te leh zirnaa hlawhtling an chawimawi te an tel a ni.
Comments
Post a Comment