Mizoram in sum enkawl thiam a mamawh - MPCC

Mizoram Pradesh Congress Committec (MPCC) chuan Mizoram in a mamawh chu sum enkawl thiam leh mi dik a ni tih an sawi.

Nimin a Aizawl Press Club-a thuthar thehdarhtute an kawmna ah MPCC Spokesperson Dr. Lallianchhunga chuan India rama nitin chanchinbu rintlak ber zinga ngaih, The Indian Express in August 1,2023 a a tarlan danin Mizoram chu State sum thawhchhuah (Gross State Domestic Product) atanga chhutin India ram State leh Union Territory zingah leiba ngah ber a ni tih sawiin, “Hei hian Mizoram Chief Minister leh Finance Minister ni bawk, Pu Zoramthanga hi Mizoram sum leh pai enkawl thiam a ni lo tih a tarlan rualin, Mizoram in a mamawh chu thusawi thiam ringawt ni lo, sum leh pai enkawl thiam hruaitu a mamawh zia a tarlang chiang hle a ni,” a ti a. Mizoram in State a nih, kum 1987 atanga kum 30 chhunga leiba a neih chhoh zel tlingkhawm leh MNF sawrkarin kum 5 chhung leka leiba a neih belh zat hi a intluk thuak tawh niin a sawi a. “Hetiang khawpa leiba pung chak hian Mizoram sawrkar hi a la awm ngai lo a, sum leh pai enkawlna kawngah MNF sawrkar ang em em a hlawhchham leh talbuai hi Mizoram-ah an la awm ngai hek lo. Leiba rulh nana leiba dang a insiam belh zel avangin Mizoram hi MNF sawrkar hnuaiah leiba thang (debt trap)-ah a tang mek a. Sawrkar lo awm leh tur tan pawha rulh huphurhawm tak, chet ti harsa tham leiba an hnutchhiat ngei dawn a ni,” a ti bawk.

MPCC Spokesperson chuan MNF Sawrkar hnuaiah MNF MLA fel tak tak awm mah se, a lu ber Chief Minister enkawlna hnuaiah thil tha lo an hriat pawh an dodal ngam chuang lo nia sawiin, “Leiba thanga tang mek Mizoram in a mamawh ber chu ram hruaitu – sum leh pai enkawl thiam, enchhin pawh ngai lo, mi rintlak leh mi dik a ni,” a ti bawk.