Zoram mipuite duhthusam ang ngeiin June ni 30, 1986-ah remna ziah a ni - Home Minister

Home Minister Lalchamliana chuan Ram leh hnam dinchhuahna turin zalenna sual a ni tih sawiin, Zoram mipuite duhthusam ang ngeiin remna (Peace Accord) chu June ni 30, 1986 khan ziah a nih thu a sawi.
Remna Ni vawi 37-na lawmna inkhawm Sawngkhara Hall, Keitum-a neih a hmanpuina ah Home Minister Lalchamliana chuan Mizoram mipui zawng zawngte duhsakna hlanin, Remna Ni chu Mizo mipuite tana chanchin lawmawm tak a nih thu a sawi bakah remna leh muanna a awm theih nana tha leh zung, nunna hlu tak hlante zahna chibai a buk a. Ram leh hnam dinchhuahna turin zalenna sual a ni tih sawiin, “Zoram mipui ten harsatna leh manganna tam tak an tawk a, dinhmun hrehawm tak atanga remna a awm theih nan Kohhran, Zirlai Pawl leh mipuiten theihtawp an chhuah a, Zoram mipuite duhthusam ang ngeiin remna (Peace Accord) chu June ni 30, 1986 khan ziah a lo ni ta a ni,” tiin “Remna hi a hlu em em a, a man pek sen rual a ni lo,” a ti a. Remna awm turin inngaihtlawm leh inphahhniam a ngaih thu pawh sawiin, hruaitu hmasa ten remna a awm theih nana an inphahhniam thei chu fakawm a tih thu a sawi bawk.

Home Minister chuan kum 20 chhung buaina atanga remna neih a lo nih khan Zoram mipuiten an hlut em em tih pawh sawiin, Remna Ni lo thleng chu mimal, thenawm leh khawtlang inremlo ten inremna ni ah hmang ngei se a duh thu a sawi a. Remna ziah a nih khan India Constitution-ah Article 371G telh a nih thu tarlangin, he Article hian Mizo Hnam leh Sakhua damna tur thui tak a hril tih a sawi a, “Nupui pasal neih leh ro luah dan tur chungchang ah Uniform Civil Code (UCC) hman a nih pawhin Mizoram bikah chuan Mizoram Legislative Assembly-in a pawmpui leh phalna tellovin UCC chu hman ngawt theih a ni lo a, Remna ziah laia Article 371 G India Constitution a telh tura theihtawp chhuah a hma latute an fakawm in an ngaihsan awm hle a ni,” a ti bawk.

Mizoram sawrkar, MNF leh India sawrkarin inremna (Peace Accord) June ni 30, 1986-a an ziah atang khan Mizoram-ah buaina lian tham sawi tur a tam lo hle tih pawh Home Minister chuan sawiin, Bru National Liberation Front (BNLF) leh Hmar People Convention (HPC) nen pawh remna tluantling leh tha tak neih a nih thu leh Vawiin-ah chuan Mizoram chu India rama State ralmuang ber niin remna leh muanna kawngah Mizoram chu State dangte awh ber a lo ni hial tih a sawi a. “Mizoram thenawmah remna leh muanna awmloh avangin mi tam takin In leh lo, nunna hlu tak an chan mek a, hei hian remna hlutzia a tilang chiang hle,” tiin, Remna ni chu Political Party pakhat ta bik a nih loh thu sawiin, Zoram mipuite neitu thinlungpu a Remna Ni chu uar zawka hmang zel thin turin a sawm bawk a ni.