Health Minister in Group YMA khawmpui hmanpui

Health Minister Dr. R. Lalthangliana chuan nizan hmasa khan Tuiphai Group YMA Inkhawmpui vawi 33-na chu Cherhlun khuaa Bethle-hem Branch YMA Hall-ah khuallian niin a hmanpui a, YMA hi awm lo ta se kan ram hi engtin nge a awm ang, tih ngaihtuah tham tak a nih thu sawiin, “Rethei leh chanhai riangvaite thliar lova chhawm-dawl a, buaipuitu pawl YMA kan nei hi a ropui takzet a ni,” a ti a. “Mizo nih a danglam a, a nuam bik a ni. Mizo hian hmangaihna, lainatna, duhsakna leh tlawmngaihna kan nei nasa hle a. Pathian in midangte tana insawrchhuah duhna thinlung Mizote min pek hi tlawmngaihna a ni. A hlu ta zet a ni,” a ti.

Kan unau Raltlante YMA leh Mizo anga kan lo dawnsawng leh kan lo buaipuite chu a ropui a tih thu pawh Dr. R. Lalthangliana chuan sawiin, “An tan kan insengso a, hun leh tha kan seng a. Zofa thalaite hi Lalpa’n ram leh hnam tana hna thawk a, Zofate insuihkhawm lehna atana inpe turin min duh a ni,” a ti bawk.