Aizawl-ah Chief Minister hovin Remna ni hman a ni

Remna ni 2023 chu nimin khan Chief Minister Zoramthanga hovin Aizawl Vanapa Hall-ah hman a ni.

Remna ni puala inkhawm ah Chief Minister Zoramthanga chuan Mizoram buaina chhuah dan te, remna nei tura beihna kawng a thui zia leh harsatna te leh Vawiin thlenga remna leh muanna kan neih tak hi a hlutzia te a sawi a. Mizoram chu tunhma a Undivided India awptu British te'n India ram an chhuahsan dawn a India ramin Danpui an siam khan Mizoram a huam tel ve loh, Excluded area a nih thu sawiin, Political party pawh nei ngailo in, kum 1946-ah Party din awih a nih thu leh kum 1947-ah India a Independent dawn tak si ah khan chutia politics a kum khat chauh a upa chuan mipui an kumkhaw awm dan tur thutlukna an siam a ngaih tak thu leh, chu thutlukna chu mi fing ber tan pawh siam thiam harsa tak a nih thu a sawi a. Ngaihdan chi hrang nga - Burma zawm emaw, Pakistan zawm emaw, India a tel emaw, British in la awpin Crown Colony a awm emaw, Independent a awm te a nih thu sawiin, “Chutah British an kian tak a Mizoram rorelna ruak ta a (political vacuum) karah India sawrkar chu rawn zuanglut ta in, a nih dan turah ngaiin keini chu kan lo pawm mai bawk a, chu chiah chu kan rambuai thu bul chu a ni,” a ti.

Chief Minister chuan India ramin mipui duhthlanna a ram a indinna ram Danpui bu an ziah lai khan Mizoram emaw, Mizo mipuite hriatpui leh tel ve miah lohna a nih dan sawiin, chumi chungchang chu Central lam hotu Mizorama lo kal thenkhat te bulah pawh lo sawipuiin, anni pawhin ngaihtuah zui tham nia an hriat thu an sawi a. Chutiang karah chuan lehlamah inrinhlelhtawnna a lo awm a, chumi kal zelah chuan buaina a lo awm chhoh tak dan a sawi bawk.

Mizoram chu ram buai a puan a nih hnuah remna leh muanna a awm theih nana kawng hrang hranga mi hrang hrangin theihtawp an chhuah dan te pawh Chief Minister chuan sawiin, Mizoram remna chu thil chi hrang hrang lian leh te zawmkhawm hmanga siam, tawrhna kara chung lamin thilpek ropui Mizo mipuite a pek a nih thu a sawi a. Mizoram chawilar nan kan thil neih hrang hrang zingah midangin an neih ve loh chu kan remna leh muanna hi a nih thu pawh sawiin, hei hi hmang tangkaia kan thenawm ram leh State a buaina awm karah remna palai kan nih theih zia te a sawi bawk a ni.

Aizawl-a Remna ni puala inkhawm hi Chief Secretary Dr. Renu Sharma chuan kaihruaiin inlawmna thu a sawi a, MKHC Committee Member Rev. Lianhmingthanga Sailo bakah NGO Coordination Committee Chairman R. Lalngheta te pawhin thu sawiin, Remna ni puala intihsiakna chi hrang hranga lawmman te sem nghal a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar