Consumer Co-Op Society in Assembly an hmang

Serchhip Consumer Co-op Society Ltd. chuan nimin khan Annual Assembly neiin hruaitu thlanna an nei.
Serchhip Kawnpui VC Hall-a Serchhip Consumer Co-op Society Ltd. Assembly hi an Chairman R. Lalngaihawma chuan kaihruaiin Secretary H. Vanlalhruaia leh Treasurer C. Lalpianthanga te hnen atangin report ngaihthlak a ni a, Managing Committee Member H. Malsawmna chuan Society Member kalkhawm te fuihna thu a sawi bawk.

Serchhip Consumer Co-op Society Ltd. Assembly hian 'Kan sawrkar in Society min kaih-hruai mekna dan (Act) min hman tir mek, Managing Committee Member chin Term hnih (2) bak a awm theih loh tih hi tha kan ti lo. Term awm lova Society Board kalpui ni rawh se. Society kalphung leh nihphung hre chiang lo hruaitu neih theih a nih avangin he dan (Act) hi hman zui kan duh lo a ni,' tih chu Resolution siamin an pass a. Kum 2023-2028 chhunga hruaitu tur thlanna neiin Chairman-ah R. Lalngaihawma (Vengchung); Vice Chairman-ah H. Malsawmna (Bazar Veng), Treasurer-ah C. Lalpianthanga (Tuikhuah Veng) bakah Managing Committee Member mi 4 thlan an ni.

Serchhip Consumer Co-op Society Ltd. hi Serchhip-a Cooperative Society hlun leh lian ber niin tun dinhmunah Share Holder 423 awm mekin an zinga 52 te erawh an awmna chin chhui zui theih tawh loh an ni a, nimin-a Assembly an neih ah hian an kum 5 kalta chhunga an Member boral 48 leh Managing Committee member mi 4 te sunna hun hman a ni.