Serchhip-ah Malaria leh Dengue zirhona neiin kumin ah Malaria pai mi 9 hmuhchhuah an ni tawh
Nimin khan Serchhip-a District Vector Borne Disease Control Programme (DVBDCP) buatsaihin Eklavya Model Residential School (EMRS), Serchhip-ah Anti-Malaria Month 2023 denchhenin Malaria leh Dengue chungchang inzirtirna neih a ni a, he hunah hian DVBD-a Consultant Lalchhuanawmi Khiangte chuan nikum (2022) leh kumin (2023)-a Serchhip District-a Malaria leh Dengue dinhmun a tarlang a, he huna tarlan a nih danin nikum January atanga May thla thleng khan Serchhip District-ah Malaria hrik pai nia rinhlelh te thisen enfiah atangin Malaria hrik pai mi 4 hmuhchhuah niin kumin ah erawh mi 9 lai hmuhchhuah an awm tawh a, nikum-a thla nga chhunga Malaria hrik pai hmuhchhuah zinga mi 3 hi PV niin midang pakhat hi PF a ni a, kumin a Malaria hrik pai hmuhchhuah mi 9 zinga 8 hi PV niin midang pakhat hi PF a ni bawk.
Nikum January atanga May thla chhung hian Malaria hrik pai hmuhchhuah tlem mah se nikum khan June leh July thla ah Malaria hrik pai hi mi 10 ve ve hmuhchhuah awmin August, September, November leh December thla ah Malaria hrik pai mi pakhat theuh hmuhchhuah an ni thung a, nikum chhung khan Serchhip District-a Malaria hrik pai hmuhchhuah zawng zawng chu mi 28 niin an zinga mi pakhat an boral a, Malaria hrik pai hmuhchhuah zinga mi 27 te chu enkawl dam an ni. Kumin a Malaria hrik pai hmuhchhuah tawh mi 9 te hi Serchhip leh Thenzawl-a hmuhchhuah mi pathum ve ve bakah North Vanlaiphai-ah mi pahnih leh Khawlailung-ah mi pakhat te an ni.
Nikum chhung vek khan Serchhip District-ah Dengue vei nia rinhlelh mi 139 awmin heng mite hi an Sample lak sak theuh niin Dengue vei mi 24 hmuhchhuah an awm a, Dengue vanga nunna chan awm lovin kumin hian January atanga May thla thlengin rinhlelh mi 29 an awm leh tawh bawk a, heng te hi an Sample lak sak vek niin Dengue vei mi pakhat hmuh a ni tawh a, nunna chan an awm lo bawk a ni.
He hunah hian Serchhip-a Senior Medical Officer (SMO) Dr. Lallawmkimi Chhakchhuak chuan zirlai kalkhawmte Malaria chungchang zirtirin Malaria laka inven dan leh he natna kai te lanchhuah dan a sawifiah a. Malaria chu Thosi nu, Anopheles seh atanga kai theih a nih thu leh Mizoram-ah chuan Malaria thlen thei Thosi hi chi hnih, Anopheles Dirus leh Anopheles Minimus a awm nia hriat a nih thu sawiin, Malaria chu chi 5 awmin Mizoram-ah chuan Malaria PF leh PV a awm thu a sawi.
He hrik pai te chu Luna, Khawsik, Tlun, Pumna leh Kawthalo te-a a lanchhuah theih thu pawh sawiin, he natna nasa zual lanchhuah dan te a tarlang a. Malaria laka kan himna turin Thosi pian theihna tur tui tling te kan thenfai-a Zan mutna ah Thosilen pangngai emaw, damdawi-a chiah emaw zar thin a pawimawh thu leh DDT hmanga In leh a vel kah tir thin tur a nih thu te a sawi a. Malaria nia inrinhlelhna nei te chuan Health Worker leh ASHA te hnenah thisen enfiah tirin Malaria kai te chu a thlawna damdawi pek an nih thu a sawi bawk.
Dengue chu Aedes Aegypti Thosi seh atang kai theih a nih thu pawh SMO chuan sawiin, Dengue hi natna chi hnih a awm thu leh he natna kai nia inringhlel te chuan rang taka Doctor pan tur a nih thu a sawi a. He natna lan-chhuah theih dan hrang hrangte a tarlang bawk.
Nimin-a he hun hmanna ah hian he School-a Middle Section tan Quiz inelna neih a ni a, High School leh Higher Secondary Section tan Slogan Writing Competition neiin a tithate hnenah lawmman hlan an ni bawk.
Comments
Post a Comment