Rajya Sabha MP in BRO hnathawh a sawipui

Mizoram Rajya Sabha MP K. Vanlalvena chuan nimin khan Border Roads Organisation (BRO) Director General, Lt. General Rajeev Chaudhry VSM chu a Office-ah hmuin Mizoram-a BRO hnathawh hrang hrang chungchang a sawipui.

He hunah hian kum thum kal tawha DoNER Ministry in NEC kaltlanga cheng vbc. 66 senna tur Sangau to Saisihchhuah kawngpui laihna tur BRO thawh tura a lo dah tawh, tun thlenga hna bul la tan loh chungchangte leh he hna thawhna tur sum sanction tawh hnuhkir leh mai tur dinhmuna ding mek chungchang te an sawidun a. He hna hi chak tak leh rang zawka thawh thuai a nih theihna tura hmalak a nih tur thu BRO Director General chuan Rajya Sabha MP hi a lo hrilh a ni.

Hetihlai hian Myanmar ram Chin Hills leh Lawngtlai District, Mizoram inkalpawhna kawng pawimawh Sangau - Saisihchhuah kawng laihna atana ruahman cheng vbc. 66 chu compensation beiseitute avangin cancel a nih thu Media thenkhat ah tarlan a ni a. Mizoram State Planning Board Vice Chairman H. Rammawi tarlan danin, Sangau - Saisihchhuah kawng laihna tur atan hian 14th Finance Commission in cheng vbc. 66 a dah a, PWD-in kawng laihna tur survey neiin, zangnadawmna tur sum ruahman tel a nih loh avangin Pang khua paltlang loa, ramhnuaia kawng kaltir turin ruahmanna an siam a ni.

Hetihlai hian Pang khawtlang chuan an khaw paltlang loa kawng kaltlang tir rem ti lovin kawng laitu tur BRO-te nen an inthurual a. Mizoram sawrkar chuan kawng laih hna chu BRO atanga PWD kuta hlan turin thuneitute ngen thin mah se, a tlang theih loh avangin sum awm mah se hna thawh theih a ni lo a. DoNER Secretary ho a tun thla ni 19-a INMC thukhawm chuan Sangau - Sasihchhuah kawng laihna tur cheng vbc. 66 hi a cancel ta a ni. Sangau - Sasihchhuah ruala project pathum pawm te chu formation cutting zawh ni tawhin backtopping hna thawh mek a ni tawh hlawm a ni.