Mizoram Governor in Champhai District a tlawh

Governor Hari Babu Kambhampati chuan ni 2 cham turin nimin khan Champhai a thleng a, nimin khan DC Conference Hall-ah Champhai a sawrkar hotute kawmin Political Party, tlawmngai pawl leh Kohhran hruaitute a kawm nghal bawk.

    Champhai-a sawrkar Department leh Bank hotute a kawmna ah Governor chuan mipui hmakhua ngaia Sawrkar kaltlanga Scheme pawimawh tak takte tha taka kalpui a tul thu sawiin, Power Supply, inbiakpawhna, Insak tanpuina, inkalpawhna, eirawng-bawlna Gas, In tina tui in tur pek leh adangte chhawpchhuah kawngah tanlak a tul thu a sawi a. Mipuite tana hamthatna leh Scheme pawimawh tak takte hun bituk chhung ngeia zawhfel hman a pawimawh thu sawiin, “Hna tih khaihlak leh tih khawtlai hi mipuite dikna leh chanvo palzutna a ni,” a ti bawk.

Line Department leh Bank hotute chu khua leh tuite tana duan Scheme pawimawh tak takte mipuiten an hriata an chhawr tangkai ngei theihna tura zirtirna tam zawk kalpui thin turin Governor chuan a chah a. Scheme-te an hriat mai piah lamah a taka an chhawr tangkai ngei theihna tura hmalakpuia tih dan kawhhmuh an tul thu sawiin, Bank hotute chu Social Security Scheme Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY), Atal Pension Yojana (APY) te mipuiten an hmelhriata, an tangkaipui ngei theihna tura hrilhfiaha hmin tum turin a chah a. Heads of Offices leh Banker kalkhawmte chu Sawkar laipui leh State Sawrkar kaltlanga hmalakna te tha taka hlenchhuak thei tura taima leh rinawm taka thawk turin a chah bawk.

Governor hi Law & Judicial Minister leh Champhai South bialtu MLA TJ. Lalnuntluanga chuan tawiawmin Mizoram University Eastern Campus Champhai-a dah anih theih nana tanlak pui turin a ngen a. Land Custom Station (LCS) Zokhawthar chu Integrated Check Post (ICP) a hlankai thuaia, dan mumal tak hnuaia insumdawntawnna kalpui anih theih nan a tul anga hmalak pui turin a ngen bawk.

He hunah hian Champhai District Bawrhsap James Lalrinchhana chuan Champhai District mipuite aiawhin Governor Hari Babu Kambhampati lawmna thu a sawi a; Champhai District chanchin kimchang, Centrally Sponsored Scheme kalpui meka hmasawnna te, hmalakna kal mekte leh hmachhawpte a sawifiah a. Champhai SP Lalrinpuia Varte-in Champhai District venhimna kawnga Police hnathawhte bakah dan leh thupek kenkawh kawnga Champhai District dinhmunte a sawifiah ve leh bawk a ni.