PHH Ration buhfai pek dan ennawn leh theih

Mizoram sawrkar chuan Priority Household (PHH) te tana Ration buhfai pek belh thin tihtawp chu a tul anga ennawn leh theih a nih thu an sawi.

    Sawrkar laipui in AAY leh PHH te tana Ration buhfai a thlawna a sem chungchangah FCS&CA Secretary Ramdinliani chuan National Food Security Act, 2013 hnuaia hamthatna dawng thei (PHH leh AAY ration card nei) te tan January ni 1,2023 atang khan thla khatah PHH (Card pawl) te chuan mi pakhat tan buhfai kg. 5 leh AAY (Card eng) te chuan Card/chhungkaw khatah buhfai kg. 35 chu January atanga December, 2023 chhung a thlawn liau liau in an dawng dawn tih a tarlang a. COVID-19 hripui len avanga Central Sawrkarin PMGKAY hnuaia AAY leh PHH beneficiary te tana an quota pangngai bakah mi pakhat zelah buhfai kg. 5 a thlawn-a a pek thin chu hri leng a ziaawm tak avangin tihtawp a lo nih tak thu leh Hripui len hma-a PHH beneficiary-te quota pangngai (5 kgs per head) baka State Sawrkar-in kg. khat Rs. 15 zel hisapa kg 3 a belh thin chu a thlawna PHH te’n an quota hi an dawn tawh dawn avangin tihtawp rih a nih thu a tarlang a. Hei hi a tul anga ennawn leh theih a nih thu a tarlang bawk.