National Pollution Control Day 2022 hmangin Single Use Plastic Free Day hman nghal a ni

Nimin khan National Pollution Control Day 2022 chu Aizawl-a MINECO tual-ah hman niin he ni denchhen hian Single-Use-Plastic Free Day hman nghal a ni bawk a. He huna kalkhawmte hian hman khat daih plastic (Single Use Plastic) tihremna kawnga tan la turin thutiam an la a ni.

Kum 1984 a Bhopal Gas chhiatna rapthlak tak a nunna chan te puala kumtin a hman thin, National Pollution Control Day leh Single-Use-Plastic Free Day puala hun hman ah hian Environment Forest & Climate Change Minister TJ. Lalnuntluanga chuan thiamna leh mihring pung zelin khawvel hmasawnna nasa takin a thlen rualin heng kan ram leh khawvel hmasawnna te hian pollution a thlen ve zel avangin kan inven thiam a ngai tih a sawi a. Boruak, tui leh ri bengchheng ven nana Dan siam te chu ngaipawimawh thar tura mitin ngenin, Assam hnuaia awm lai atang tawhin Mizoram sawrkar chuan kan ramngaw te humhalh nan tan nasa taka a lo lak tawh thin thu a sawi a, tlawmngai pawl leh sawrkar hmalakna te pawhin ngaihhlut a hlawh chho zel chu a lawmawm takzet a ni, a ti a. Khawpui chhunga ramngaw siamna tur - Nagar Van Scheme chu Municipal Area chauh huam tur a duan ni mah se, Mizoram District Capital zawng zawng te huam teltir tur a Central sawrkar an ngenna chu tihhlawhtlin sak an nih thu a sawi bawk.

He hunah hian Chief Secretary Dr. Renu Sharma pawhin Central Pollution Control Board-in hman khat daih plastic tihtawp kawnga hma la tha State a thlanchhuahah Mizoram chu rampum huapah 12-na leh hmarchhak State te zingah 1-na a ni thei chu thil chhinchhiahtlak tak a nih thu sawiin,ram leilung venhimna atan kan tan zual sauh sauh zel a pawimawh thu a sawi a. Mizoram Pollution Control Board Member Secretary C.Lalduhawma chuan hman khat daih plastic titawp tura hmalakna leh hmachhawp hrang hrang tarlangin, Prime Minister Narendra Modi pawhin a ngaihpawimawh takzet thu leh hmalakna report te chu ni 15 danah thehluh ziah a nih thu sawiin, Central Pollution Control Board kaihhruaina hnuaiah State Pollution Control Board hrang hrang te chuan hmalakna thlirletin kartin Meeting an neih ziah thu a tarlang a. Mizoram sawkar hnuaia Department 21 bakah School 1921 leh College 11 zet te chuan hmankhat daih plastic hmang lo tura an intiam tawh thu leh Office leh School dang thahnem takin nimin a hun hman mek pual hian an rawn zawm ve tur thu a sawi bawk.

Nimin-a he hun hman hi Secretary UD&PA Lalmalsawma Pachuau IRS chuan kaihruaiin Plastic aiawh (alternative) siamtu ten an thilsiam te an phochhuak bawk a ni.

Single Use Plastic Free Day-ah hian College zirlaite pualin Govt. Hrangbana College-ah hun hman a ni bawk a. Chawhnu lamah Mizoram Pollution Control Board kaihhruaiin Chawnpui High School-a EcoClub naupangte leh Chawnpui Local Council-te leh Save Mizo-ram River-te nen Chawnpui Vêng a Tuikual lui chu an tifai bawk a ni.

Hman khat daih Sarâng (Single Use Plastics - SUPs) hi Plastic Wastes Management Rules 2021 chuan siamchhuah, hman leh hralh te a khap tâk avângin Mizoram sawrkâr pawhin hêng hman khat daih plastic-te tirêm tura hma lâkna tur kawng (Comprehensive Action Plan) a duang fel tawh a, kumin chhûnga tirêm vek tura sawrkar laipui thupêk a nih angin tûnlai hian Special Task Force for Elimination of Single Use Plastics (SUPs)-te' n a khât tâwkin District khawpui hrang hrangah endikin an man thin bawk a ni.