Bialtu MLA in MLA Fund atanga Lawngleng lei Tlawng lui-a Lo leh Nul neitute hman turin a hlan

Serchhip bialtu MLA Lalduhoma chuan Thenzawl leh Buarpui inkar Tlawng lui kan-a Lo leh Nul siam ten bungrua thiarna atana an mamawh Lawngleng MLA Fund atanga a lei chu nimin khan helai hmuna kuthnathawktute hnenah a hlan.
MLA Fund atanga Rs. 40,000/- senga lei he Lawngleng inhlanna hun nimin-a Tlawng Lei hnuai-a neih ah Serchhip bialtu MLA Lalduhoma chuan Mizoram-a luidung hausakna chu ei leh bara kan ram dinhmun chawikang khawpa hman theih nia a hriat thu sawiin, “Luidung kawng awm mumal lohna tam tak, cheibawl ngai a awm a, heng kan luidung leh kan ram hausakna hi eizawn nana siam theih a ni,” tiin, ram leilung leh luidung hman tangkai chu an ngaih pawimawh anih thu a sawi a. Mizoram-ah mipuiin an chhawr reng reng loh tur Project, vaibelchhe tam senna, hluihlawn leh mai mai, mi tlemte in an hlawkpui tura pawisa tam tak hmanna a tam nia sawiin, pawi a tih thu leh a taka hnathawktu ngei ten a hlawkna an chhawr theih tur project siam a, ram leilung hman tangkai an tum thu a sawi bawk.

Lawngleng inhlanna hun hi Tlawng kam-a Zau neitu C. Rozamliani chuan kaihruaiin tuilian in tunhnaiah an mimal Lawngleng tum hnih lai a lenbo sak thu sawiin, an harsatna te Bialtu MLA Lalduhoma hnenah thlenin, rang taka a rawn tihsak chu an lawm hle tih a sawi a. Tlawng lui behchhan hian Thenzawl khuaa chhungkaw 20 vel chuan buh leh thlai chi hrang hrang chingin, eizawn nan an hmang hlawm a. An zinga chhungkaw 13 vel chu hmun nghet neia Tlawng kam-a eizawng niin, chhungkaw 7 vel chu kahpaha, Thlasik thlai chinga he luidung eizawn nana hmang an ni.

Serchhip Bialtu MLA leh ZPM Leader ni bawk Lalduhoma hian nizan hmasa khan Thenzawl Bazar Veng-a Vantawng Group YMA Run-ah an Party in mithar lawmluhna hun an buatsaih chu hmanpuiin Thenzawl leh a chhehvela an Party zawm thar mi 226 a lawmlut a. He hunah hian ZPM Leader chuan Mizoram-ah Kohhran tha kan nei tih sawiin, “Kohhran chuan Kohhran-a Thlarau nun piah lamah mihring nun siamthatna kawng hrang hrangah hma lain, hlemhletna do te a aupui reng a, chutihlain, kan ramah ram siamtha tura thuneihna neitu Sawrkar tha kan neih loh avangin kan ramin a chhiat phah mek a, kan ram siamtha turin mipui ten sawrkar tha kan siam a tul a ni,” a ti a. Israel, Juda History-ah lal tha an neihin, ram a tha a, lal tha lo an neihin ramin a tuar thin tih sawiin, “Kan ram chhiat chhan hi Kohhran vang a ni lova, Sawrkar tha kan neih loh vang a ni,” a ti bawk.