Serchhip-ah Badminton Tournament khel tan

Serchhip Kawnpui Badminton Club (SKBC) buatsaih ‘Vanlalhruaia Memorial SKBC Invitation Badminton Tournament’ chu nimin khan Serchhip Indoor Stadium-ah khelh tan a ni.
Tunkar Zirtawpni thleng awh tura ruahman he Tournament hawnna inkhawm nimin-a neih ah hian Badminton Tournament Main Sponsored leh Tournament hming tumtu Vanlalhruaia (L) chhungte aiawhin a u, Vanlalchhunga (Serchhip Vengchung) chuan a nau boral atanga thla 4-na leh a pianchampha ah tak he Tournament hawnna hi neih a nih thu a sawi a. Serchhip leh Mizoram hmundanga thalaite tan infiamna hun hlu tak buatsaih a ni chu lawmawm a tih thu a sawi bawk.

SKBC Vice President C. Lalnunpuia kaihhruai he hunah hian Aizawl District Badminton Association Central President R. Vanlaltluanga (Matluanga) pawhin Badminton chu Mizoram a infiamna te zingah game hautak tak pawl ni mah se Serchhip Kawnpui Badminton Club (SKBC) ten Badminton Hall changtlung leh tha tak, Carpet phah chung ngeia Tournament liantham tak buatsaih thei chu ropui a tih thu a sawi bawk a ni.

Tunkar Zirtawpni-a zawhfel tura ruahman he Tournament-ah hian Serchhip District bakah District pawnlam atang pawhin Badminton khel thiam mi engemaw zat telin Category 10-ah inelna neih a ni dawn a, match 96 awm tura ruahman a ni.