Rokunga Award 2021 Malsawmkima hlan dawn

Kum 2018-a bul tan, Rokunga Memorial Society in kum thum dana an hlan thin Rokunga Award 2021 chu kumin hian Malsawmkima, Saitual Venglai hnenah hlan a ni dawn a, tun thla ni 28 khian hlan a nih tur thu Rokunga Memorial Society chuan nimin khan Aizawl Press Club-ah thuthar thehdarhtute kawmin an sawi. Kum 64-a upa Malsawmkima hi khawtlang tana a thahnemngaihna avangin kum 2006-ah khan misual in gelatine hmangin a chenna In a bomb sak a. Kahhlum tuma veh a lo ni tawh a, chempuia sahhlum tuma luhchilh a ni tawh bawk a. Kum 20 mi a nih laiin Tlawmngai ber-ah thlan a nih tawh bakah ‘Tlawmngai Nopui’ te pawh an lo hlan tawh bawk a ni.