Pathian leh mipui zarah sawrkarna kan chang a nih chuan kan danglam dawn - ZPM President

ZPM President Lalliansawta chuan Pathian leh mipui zarah sawrkarna an chang ve hlauh te a nih chuan an danglam dawn tih sawiin, hruaitu bawr an invuah danah buaina an neih loh thu a sawi a. Kum 2023 MLA inthlanpui neih turah an party in MLA seat 40 chu an chuh kim vek dawn niin a sawi bawk.

Nimin-a Aizawl Press Club-a thuthar thehdarhtute a kawmna ah ZPM President Lalliansawta chuan Pathian leh mipui zarah sawrkarna an chang ve hlauh te a nih chuan an danglam dawn tih sawiin, “Kan hotuten ZPM sawrkar ruangam tur chu hmun hrang hrangah an tlangaupui mek a. Hruaitu kan invuah dan – Leader, President, Working President bakah Val Upa Council te kan ti a, sawi pawh a hlawh hle. Heng kan hruaitu bawr invuah danah hian buaina kan nei lova, a remchangin a tha hle a ni tih a hmangtute hi chuan kan hria,” a ti.

ZPM President chuan ram kalsiam kan thlir ngun poh leh kan rilru a thawpik ringawt mai thin te chu a fello nia sawiin, “Mizo Kristian kan nih chhung chuan ram mipuite beiseina nung siamsak turin tih theih kan nei a, kan tih duh leh duhloh-ah a innghat a ni. Sawrkar hi thilthlawnpek semtu ni lova, ram hmasawnna tluantling duanga hmalatu tur a ni a. Ram mipuiten hmasawnna tluantling, ruangam tha leh tlo sawrkar lak atang hian kan beisei tur a ni,” a ti a. Sawrkar dik tak chu ropui taka chungnung lurh ni lovin, mi rethei ber leh mawlmang ber kaihkuahphak a ni zawk tih a sawi bawk.

October 2022 atangin ZPM Party chuan ‘Vangpui Fehchhuah’ an neih dawn thu pawh sawiin, Mizorama khua zawng zawng tlawhchhuak vek tura duan a nih thu leh a thawhkhatna atan District 5 - Mamit, Kolasib, Saitual, Khawzawl leh Champhai District te tlawh turin ruahmanna an siam thu a sawi a. Khaw 218 tlawhchhuak turin Group 39-ah an inthen thu pawh sawiin, “Khawtin a ZPM dinhmun bakah khaw 218 te harsatna leh mamawh te uluk taka zirchiang tura fehchhuak tur kan ni,” a ti bawk.

Thuthar thehdarhtute zawhna chhangin ZPM hruaitute chuan kum 2023 MLA inthlanpui lo awm turah an party in Seat an chuh kim vek dawn tih an sawi a, an candidate tur tihfel an la neih loh thu te, bial vil tur pawh tumah ruat an la neih loh thu te an sawi bawk.