Braille text book sem a ni

School Education Minister Lalchhandama Ralte chuan Blind School-a zirlai mitdelte hman tur Braille Text book chu nimin khan a sem.

He textbook semna a Pisa-a neih ah hian School Education Minister chuan Mizoram tana chhinchhiah tlak tak zirlai mitdel te'n an chhiar theih tur zirlaibu an nei ve ta chu lawmawm a tih thu sawiin, “Heng zirlaite tan zirlaibu an neih hmasak ber a ni a, an tan chuan chanchin tha a tling a, an khawvel hma lam a tieng hle dawn a ni,” a ti. Minister chuan High School zirlaite tan pawh Samagra Shiksha-te nen hmalak zui a nih tur thu sawiin, Mitdel te tan pawh mi pangngaite nen inelna tha an nei thei tawh tur thu te, harsatna karah mi ropui tak tak an chhuak thin tih hre reng turin a chah bawk a. Braille textbook an neih thar chu khawvel hriata an talent phochhuah nan a tangkai a beisei thu a sawi bawk.

He hunah hian MBSE Secretary Sarah Lalzampuii chuan Braille text book buatsaih dan tarlangin, tun dinhmunah hian mitdel lehkhabu (braille textbook) dawng tur zirlai panga (5) Higher Secondary Stage lamah an awm a. High School Stage-ah hian mitdel lehkhabu dawng thei tur mi panga (5) bawk an awm a. Large font print textbook dawng thei tur Higher Section-ah mi paruk (6) leh High School-ah mi pasarih (7) an awm mek bawk a ni. 

  Commissioner PWD chuan April 2022 ah Braille text book buatsaih turin MBSE-ah a thlen a, chumi bawhzui chuan MBSE in Dehradun-a National Institute for Empowerment of Persons with Visually Disabled (NI-EPVD) te an dawr zui a, NCERT textbook chu mamawh ang print sa an neih thu hriat a ni a. Braille texbook an neih sa chu Mizo zirlaite hnenah semchhuah theih a lo ni ta a ni tih a sawi. Nimin-a Braille textbook sem te hi History, Political Science, English leh Sociology te niin Commissioner PWD Vanlaldiki pawhin he hunah hian thu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man