Chief Secretary in sawrkar hnathawk te Annual Sports Meet a hawng

Mizoram Civil Service Sport & Cultural Association Annual Sports Meet vawi 33-na chu nimin khan Aizawl Ramhlun Indoor Stadium-ah neih tan a ni a, Chief Secretary Dr. Renu Sharma IAS chuan a hawng a ni.

Annual Sports hawnna ah hian Dr. Renu Sharma chuan Mizoram Civil Service Sport & Cultural Association Annual Sports Meet 2022 neih a ni thei chu lawmawm a tih thu sawiin, Sports hi taksa hrisel nana insawizawina tha berte zinga mi a ni, a ti a. Players te chu champion tuma tang taka khel theuh turin duhsakna a hlan a. Amaherawhchu, he Sports buatsaih chhan ber Mizoram sawrkar hnuaia hnathawk te inhmelhriatna, inunauna, leh inthian thatna te a ni tih hre reng turin a fuih a. He Annual Sports hian an hnathawhna kawnga hmasawnna thlentu a lo nih a beisei thu a sawi bawk.

Annual Sports Meet hi October ni 11 atanga ni 14 inkar chhunga khelh tura ruahman a ni a, Sport discipline 4- Chess, Carrom, Badminton leh Table Tennis-ah te intihsiakna neih a ni ang. Mizoram Sawrkar hnuaia hna thawk mi 1300 vel he Annual Sports Meet-ah hian an tel a. Chess hi MPRO Hall Shivaji Till-ah ah khelh a ni anga, Table Tennis hi MSSC Table Tennis Hall, Kawltheihuan-ah khelin, Carrom hi Ramhlun Indoor Stadium-ah leh Badminton hi Ramhlun Indoor Stadium leh Bawngkawn YMA Hall ah te khelh a ni ang.

Nimin-a Annual Sports Meet hawnna hun hi MCS&CA Vice President Dr. Chawngthanchhunga chuan kaihruaiin Lalthanzuala, Mizoram Police International Badminton Player chuan Oath taking hun a hmanga. Rosangliana, General Secretary, MCSS&CA chuan report tawi pein, COVID-19 avanga kum 2 chhung neih theih a nih loh hnua MCS&CA Annual Sports Meet neih a ni leh thei ta chu lawmawm a tih thu a sawi a ni.