Mizoram hmun hrang hrangah Sazu puang in Buh seng mai tur nasa takin a seh chhia

Tunlai hian Mizoram hmun hrang hrangah Sazu a puang a, Buh seng mai theih tur a eichhe nasa hle.

Agriculture Director James Lalsiamliana sawi danin Mizoram District tinah Sazu hian thlawhhma a buh an tichhe nasa hle a, hriat theih chinah Mamit District-a West Phaileng RD Block hnuai a khaw parukte thlawhhma chu Sazu puang hian a tichhe nasa hle a, Tuirum khua a chhungkaw 7-te thlawhhma hectare 2 a zauva buh an chín phei chu Sazu hian a seh zo vek a, Buh thar tur an nei lo anga ngaih a ni a, Damparengpui, Khawhnai, Saithah, Lallen leh Kawnmawi khua ah te chuan Sazu hian a seh zawhsak vek lova. Kawnmawi khuaah hian buhvui bakah Vaimim a seh chhe hle bawk a, West Phaileng RD Block hnuaia khaw parukah hian chhungkaw 297 thlawhhma a buh a tichhe nasa hle a, an thlawhhma hi hectare 95 point 6 vela zau a ni.

Lunglei District-a Mualthuam North khua-ah chhungkaw pakhat buh thar tur chu Sazu in an eizo vek niin thu dawn a ni a, Aizawl khawpui hnaiha awm Lengpui khua a loneitute pawhin an khaw loneitute thlawhhma chu Sazu-in a tihchhiat nasat thu leh Sava (Vaki leh Pít) pawh an nghal lutuk niin an sawi a, Champhai District-a Tualcheng leh Selam inkara Leilet buh te pawh Sazu hian a tichhe bawk.

Agriculture Director chuan an Department thawktute’n loneitute hnenah ‘Sazu Tur’ hman dan an zirtir mek thu sawiin, thlawhhma thlo fai thate aiin thlo hneh lo deuh, vau leh an thlawhhma inkar thlo fai tha lo deuhte lo chu Sazu-in a seh nasa zual ni a report an dawn thu a sawi a. Department chuan sazu-in buh a tihchhiat venna atan theihtawp a chhuah reng thu a sawi. James Lalsiamliana chuan Sazu hi a puang nasa tih hmun engemawzat atanga report an dawn thu a sawi a, chik taka zirchian a la nih loh avangin buhvui tichhetu hi Sazu vek a nih leh nih loh bakah Sava a nih ve theih thu a sawi a. Sazu puan chiam chhan hi Rawnal tâm mêk vang nge, kum 2025 a Rawthing a tam dawn vang tih chu zirchianna a la awm lo niin a sawi bawk. ‘Thingtam’ thlen hnuhnun ber chu kum 1977 a nih avang leh kum 48 dana rawthing a tam avangin kum 2025 khian Thingtam hi thleng leh ngei tura hrilhlawk a ni.

Comments

Popular posts from this blog

Volleyball S/F khel dawn