Mipui chanvo atanga chanai neih ve tumna dan a ni - ZPM Leader

ZPM Leader Lalduhoma chuan The Mizoram (Land Revenue) (Amendment) Bill, 2022 chu ‘Mipui chanvo atanga chanai neih ve tumna dan’ niin a sawi.

ZPM Party in nimin-a Aizawl a Chhung Inkhawm an neih ah ZPM Leader leh Serchhip bialtu MLA ni bawk Lalduhoma chuan Mizoram Assembly Session hnuhnung bera pass tak ‘The Mizoram (Land Revenue) (Amendment) Bill, 2022’ chungchang sawiin, “Mipui chanvo atanga chanai neih ve tumna dan a ni,” a ti a. “Kan mimal pawisa Mizoram sawrkarin heti zat hi kan lo hmang ve ang, tih ringawtna dan hi a huatthlala a, a diklo hrim hrim a, hetiang dan tha lo tak siamtu Congress an ni a, a hmangtu leh a aia nasa lehzuala dahngheh tumtu chu MNF an ni. Heng party pahnihte hian mipui min hmangaih lova, mipui hmakhua an ngai lo a ni,” a ti.

An Party (ZPM) chuan tuna Bill an put luha 75(A) tih loh a dang zawng zawng chu an pawm vek tih pawh sawiin Lalduhoma chuan, “Kha dan pass a niha a that turzia, LSC nei lo pawhin Property Card te an nei thei tawh dawn a, loan te an la thei tawh dawn a ni, tih te pawh kha a tha. MNF sawrkar siam anga an sawi erawh pawi ka ti a, Central sawrkar rawn siam sa an copy mai a ni,” a ti a. ZPM chuan duh loh an nei tih pawh sawiin, “Kan duh loh chu ram neitu ni ve uk si lo Politician te, Official te, Compensation dawng tura an lo inrawlh ve thin hi a ni. Dikna kengkawhtu tura kan ngaih kan ram hruaitute compensation dawnna tur lam apianga an kal a, Revenue Minister hova hetianga an thuneihna hmanga ram neitu ni ten an dawn ve theihna tur kawng an zawng vak hi kan duh lova, hei hi kan hua a ni,” a ti bawk.

Hemi hmalam hian Revenue Minister Lalruatkima chuan MNF Chhung Inkhawm ah The Mizoram (Land Revenue) (Amendment) Bill, 2022 chu thingtlang mi tan malsawmna a ni dâwn tih sawi tawhin, “Tuna zangnadawmna lakna tur ho ah hian ‘cut’ a ni dâwn lo, thil kal mek a nih avangin. Thil lo la awm turah chauh ‘cut’ a ni dâwn,” a lo ti tawh bawk a ni.