Mahni intihhlum dona ni hmang

Vawiin September 10, 2022 hi khawvel mahni intihhlumna thleng thin tihbona tura beihpui thlakna ni, ‘World Suicide Prevention Day’ (WSPD) a ni a, he ni pual hian Serchhip District-ah chuan nimin khan hun hman a ni.
‘World Suicide Prevention Day’ pual hian Serchhip District-ah chuan District Mental Health Programme (DMHP) buatsaihin nimin chawhma dar 10:30 khan Ser-chhip District Hospital OPD-ah hun hman a ni a, he hun hi Dr. K. Lallawmzuala Medical Officer (DMHP) chuan kaihruaiin Jane Zodingliani Lailung, Clinical Psychologist chu Resource Person atan hman a ni a, thu sawiin kumtin-a he ni hman a nih chhan leh kumin hian ‘Creating Hope Through Action’ tih chu thupui-ah hman a nih thu a sawi a. Rilru lama harsatna nei leh ruihhlo ngaite zingah mahni intihhlum duhna nei an tam thu sawiin, ruihhlo ti ve ngai lo te pawhin kan thiltih leh chetzia hmangin midangte tana beiseina siamtu kan nih theih zia leh harsatna chhawk zangkhaitu kan ni thei tih kan hriata kan tawnhriat atang pawhin harsatna tawk te puiin, an nunna hial kan chhan sak thei a ni tih kan hriat a pawimawh thu a sawi a ni.

World Suicide Prevention Day puala he hun hman hi Dr. Joseph Lalmuanpuia Hauzel (ENT) leh Dr. Lalrinzama (Paediatrician) te pawhin an hmanpui a, kalkhawmte hnenah mahni intihhluma thleng thin tihbo a nih theihna tura thuziak te semchhuah a ni a, hetiang lama harsatna nei leh mithiamte rawn duh tan Helpline No. (Mental Health/Rilru hrisel - 93661919341, 7005983633) leh Synod Family Guidance and Counselling Centre Ph. No. 8974136790 te biakpawh theih reng an nih thu tarlan a ni bawk.

World Suicide Prevention Day hi kum 2003 atang khan World Health Organisation (WHO), World Federation Mental Health leh International Association for Suicide Prevention (IASP) te chuan hmangin Serchhip District-ah chuan 2017 atangin hman a ni.