Hlawh tihpun ngiatin Samagra-a thawktu ten Vawiin atangin Badge dum an bel dawn

Federation of Mizoram Samagra Employees (FEMSE) a tel sawrkar hnathawk mi 5,000 chuangte chuan Pay Revision chungchangah sawrkar atanga thu lawmawm an hmuh loh avangin Vawiin, June 7, 2022 atangin an hnathawhna ah Badge dum an bel dawn a, Serchhip District-a FEMSE Member te pawhin Vawiin hian Badge dum hi an bel tur thu an sawi a ni.

Tunkar Thawhlehni khan FEMSE Office Bearers te hi thukhawmin Samagra Employees te Pay Revision chungchangah sawrkar atanga thu lawmawm leh hmasawnna engmah a awm loh avangin Badge dum bel nise tiin an rel a, July ni 7, 2022 atangin Samagra hnuaia thawk zawng zawng te chu mahni hnathawhna hmun theuh a Badge dum bel vek turin an inhriattir a, an kal zel dan tur chu Vawiin hian FEMSE Council Extended Meeting in an rel dawn a ni.

FEMSE hruaitute chuan Samagra employee te chu Education Department hnuaia mi vek an nih thu leh mi 5,000 chuang an nih thu an sawi a, kum 11 bawr vel an Pay Revised loh a an awm tawh thu te, kum 2019-a nawrh huaihawtin November ni 21, 22 leh 25, 2019-ah Mass Casual Leave an lak hnuah sawrkarin December 20, 2019-ah Study Group a din thu te an sawi a, November ni 27, 2020-ah Sudy Group ten an report chu sawrkar-ah a thehluh thu an sawi a. Kumin June 10, 2022-a Vanapa Hall-a inkhawmpui an neih ah, Samagra Employee te hlawh tihpunna tura Finance Department proposal chu an pawm theih loh thu leh FEMSE proposal ang ngeia tihpun nise, ni 10 chhung ngeia tihfel ngei ni rawh se, tih resolution an pass leh thu sawiin, hetihlai hian July ni 4, 2022-a Cbinet Meeting Agenda-ah Samagra hnuaia thawkte hlawh tihpun chungchang hi tel mah se, sawrkar thuchhuahin Council of Minister in agenda an pawm a tarlan zingah a tel ta lo niin an sawi a ni.

FEMSE hnuaiah hian Association hrang hrang an awm a, chungte chu: Mizoram SSA Teachers' Association (MASTA), Mizoram RMSA Employee Welfare Association, SSA Resource Person Association of Mizoram, Mizoram Instructor Association, Mizoram Samagra Management Staff Association, Samagra Academic Support Staff Association, SEAM Marakanda, Mizoram Hindi Shikshak Sangh CAS leh Special Educator Association (Elementary) te an ni a. Vawiin July ni 7, 2022 atanga Badge dum an bel tur chu hun biktuk an siam loh thu leh a tul dan ang zelin an kal dan tur ngaihtuah a nih tur thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man