Mizoram-ah PMAY atangin mi 5511 ten In sak tanpuina an dawng tawh

Mizoram-ah Pradhan Mantri Awas Yajona - Housing For All Scheme hnuaia mirethei In sak tanpuina chu mi 5,511 in an dawng tawh a, kumin kum tawpah mi 17,500-in an dawn hman beisei a ni.

Rural Development Department-a Joint Secretary Irene Zohlimpuii Chongthu sawi danin Mizoram-ah PMAY-Housing For All Scheme atanga Insak tanpuina dawng tawh te chu mi 5,511 an ni a, kumin kum tawpah mi 17,500 ten an dawn hman beisei niin nakum March thla ah chuan mi 20,512 in an dawn theih beisei a ni. RD Department Joint Secretary sawi danin he Scheme hmanga tanpuina hi Central in za zela 90 a tum tur niin State sawrkarin zaa 10 a tum dawn a, NE State nilo hmun dangah erawh Central in za zela 60 tumin State sawrkarin za a 40 a tum thung a ni.

He Scheme dawng tura thlante hian Swachh Bharat hnuaiah Rs. 12,000 chu inthiarna siam nan an dawng thei dawn a, National Drinking Water Programme hnuaiah Tui Connection a thlawna an dawn bakah Electric leh Gas Connection te pawh a keng tel a ni. 

He Scheme in a tum ber chu mi rethei In leh lo nei zo lo ten In an neih ve theih tur a ni a, In chhe tawh tak te siamthatna tur neilo te tan leh khuarel chhiatna avanga mahni In chan te tana duan niin chhungkaw member zinga hnathawktu awm lo leh eizawnna nei zo ve lo te tana duan a ni.

Pradhan Mantri Awas Yajona - Housing For All Scheme hi November 2016 khan bultan a ni a, he Scheme hmang hian mirethei In leh lo neilo tam tak te In neih tirin kum 2022 thlenga hman tura duan a ni a, amaherawhchu a hun chhung hi pawhsei niin March 2024 thleng hman a ni dawn a ni.

Comments

Popular News (Last 30 Days)

LPG man bithliah thar