Bru tlanchhia mi 707 te Tripura E. Roll ah thun tawh

Mizoram atanga Tripura a tlanchhia Bru voters 707 te chu Tripura Electoral Roll-ah thun an ni tawh.

Mizoram Election Department thawktute sawi danin Tripra Electoral Roll a thunluh te hi Hachhek bial atangin Voters 364, Dampa bial atangin 34, Mamit bial atangin 178, Tuirial bial atangin 63, Kolasib bial atangin 16, Serlui bial atangin 43, Thorang bial atangin 4 leh West Tuipui bial atangin voters 5 te an ni.

Election department thawktute sawi danin Tripura sawrkarin an State a inbengbel, In leh lo nei ngei te chu enfiahin an State Electoral Roll-ah an thun a. Voters thun thar te hi ERO Net-ah dah zel a ni a, heng mite hi automatic in Mizoram Electoral Roll atangin paih (delete) nghal zel an ni bawk a. Tunah hian Tripura Electoral Roll a inthun dil voter engemaw zat an la awm nia thudawn a ni bawk.

Mizoram atanga Tripura a tlanchhia Bru te hi Mizoram Home Department chhinchhiah dan leh Tripura sawrkar chhinchhiah dan a inang lo a, engzat chiah nge Tripura Electoral Roll-ah thun an nih dawn a la hriat loh a. Chief Electoral Officer, Mizoram chhinchhiah danin kum 2018 MLA inthlan dawn khan Tripura-a tlanchhia Bru, Mizoram Electoral Roll-a hming chuang (vote nei) hi 11,232 an awm a ni.