Hlawh tur Budget-a dah hman zawh loh tam

Mizoram sawrkar Finance Department chuan chhut tawh chinah kum kalta 2021-2022 chhunga hlawh tur Budget a dah atangin cheng vbc. 336 zet hman zawh lohin a awm tih an sawi.

Kum 2022 atanga 2023 inkar chhunga hman tur Budget-ah Sawrkar hnathawkte hlawh a kum hmasa aia dah tlem chungchang sawifiahna an siamah Finance Department chuan Budget buatsaih dawn hian Department tinah an hlawh mamawh zat tur hisap chu Finance Department-ah pe tura hrilh vek an nih thu leh hetah hian a tlangpuiin Department ten an venthawn leh thahnem ngaihna avangin an pe tam hle thin tih an tarlang a. A tlangpuiin hlawh tura Budget-a dah hi hman sen a ni ngai lo tih tarlangin, “Kumin kum kalta 2021-2022 kum chhunga hlawh tur Budget a dah pawh kha tuna chhut chhuah tawh chinah chuan cheng vbc. 336 zet hman zawh lohin a awm a. Hei hi chhut chhuah kim vek hunah phei chuan cheng vbc. 400 chuang zet tling tura ngaih a ni,” an ti.

Hetiang hi a nih avangin Budget buatsaihtu Finance Department chuan kum 2022-2023 Budget-ah chuan chutiang chu a nih tawh loh nan a tak taka mamawh zat tur hisapin Budget-ah hian hlawh tur a dah ta tih pawh an thuchhuah ah hian tarlangin, “Tuna Budget-a hlawh tur dah hian daih ngei tura chhuta dah a ni e. Budget siam laia la awm lo mamawh thar lo thleng palh a awm a nih pawhin chungte pawh chu a mamawh ang zelin pek tura inruahman zel a ni ang,” an ti bawk.