Serchhip-ah Police ten Juvenile Justice Act leh POCSO Act chungchang an zirho

Nimin khan District Child Protection Unit (DCPU) Serchhip buatsaihin Serchhip-a Police leh Special Juvenile Police Unit (SJPU) te tan Juvenile Justice (JJ) Act leh Protection of Children from Sexual Offences (POCSO) Act hnuaia Police te tihtur leh an hmalak dan tur zirhona neih a ni.

Women & Child Development Department hnuaia District Child Protection Unit in Serchhip SP Conference Hall-a he zirhona hun an buatsaih hi Serchhip DCPU-a District Child Protection Officer Lalsiampuii chuan kaihruaiin he hun hmanpuitu Serchhip SP Stephen Lalrinawma chuan POCSO Case te chu Case pawimawh bik tak a ni tih sawiin, a chhui leh bawhzuina kawngah pawh fimkhur a ngai a nih thu leh dimdawi taka enkawl an ngaih thin thu a sawi a. He training a lo kal te chu Serchhip District tana tangkai tak ni ttheuh thei turin a fuih a ni. A sawi zelna ah Serchhip SP chuan a chhunga mipui cheng zat enin Mizoram chu POCSO Case tamna ber zinga mi a ni tih a sawi a, Khawpui ah chauh nilo thingtlang ah pawh hemi kaihhnawih thubuai a tam thu sawiin, a hremna a nat avangin inzirtirna neih that a ngai hle a ni, a ti a. He huna tel Police zawng zawng te chu mipuite thlamuanpui theih ni tura dan an hriat a pawimawh thu sawi bawkin, chutiang ni thei tur chuan training neih a ngai thin a ni, a ti a. District Child Protection Unit in hetiang hun tha tak an buatsaih thin chu lawmawm atih thu a sawi bawk.

He hunah hian Serchhip DEF te bakah Special Juvenile Police Unit te telin Serchhip SDPO Kaste Romalsawma pawhin thu a sawi a. He hunah hian District Child Protection Unit atangin Legal cum Probation Officer Liansangpuii chuan JJ Act chungchang kalkhawmte hi a zirtir a, POCSO Act chungchanga R. Lalramdinmawii chuan zirtirna pe bawkin Police te leh Special Juvenile Police Unit te tihtur leh an hmalakna tur hrang hrang chungchangah District Child Protection Officer Lalsiampuii chuan zirtirna a pe bawk a, zawhna leh chhanna hun hmangin sawihona hun huamzau taka neih a ni bawk.