Junior Cricket-ah Lungpho champion

Serchhip District Cricket Association (SDCA) buatsaih Junior Cricket Tournament hmasa ber chu nimin khan khelh zawh niin Lungpho CC chu an champion.

DC Playground Khawtetlang-a khelh Junior Cricket Tournament hmasa ber hi niminpiah khan khelh niin zawhfel nghal tura ruahman ni mah se khua in a bumro avanga khelh zawh theih a nih loh hnuah nimin khan khelh chhunzawm leh a ni a, a hma ni-a Semi Final khelh zawh hman loh chu khelh zawh hmasak niin, Lungpho CC hian AO3C chu wicket 5-a hnehin Final an lut a, a hma ni-a Final lut tawh Hmar Veng CC leh Lungpho CC te hian chawhnu lamah Final hi an khel zui ta a ni.

Nimin a Final khelh ah hian Hmar Veng CC te toss ah chakin vawm hmasak an thlang a, Lungpho CC hian vaw hmasa in Overs 15-ah Wickets 6 hloh in run 101 an siam a, Lalpekhlua chuan run 25 siamin Remruatsanga chuan run 20 a siam bawk a, Lalrempuia chuan run 16 siamin Zohmangaihsanga leh Roger-a te chuan run 15 ve ve an siam a, Lalrinpuia chuan run 2 a siam bawk a, Extra run 8 an nei bawk a, target sang tak an siam sak a ni.

Hemi hnu hian Hmar Veng CC te hian vaw chhunzawm ve leh nghalin a khat tawkin wicket an hloh chho deuh mawlh mawlh a, over 14.2 ah run 39 chiah siamin wicket 10 an hloh a, Lungpho CC hi run 62 in an chak a, Hmar Veng CC tan hian Samuel-a chuan run siam tam berin run 11 a siam a, midang run 10 siam tling thei an awm lo a ni.

Tun tum Cricket Tournament-a champion Lungpho CC hian Trophy bakah Rs. 8000/- dawngin pahnihna Hmar Veng CC hian Trophy leh Rs. 5000/- an dawng a, Team tel zawng zawngte hi Rs. 2000/- theuh pek niin Man of The Tournament atana Zohmangaihsanga (Lungpho CC) chu Man of the Tournament atan thlan niin lawmman hlan a ni bawk.