Joint Secretary in sawrkar hmalakna tha a ti

Ministry of Housing and Urban Affairs, Govt. of India-a Joint Secretary (Coordination and North East) Pankaj Kumar Singh chuan a hmuh chinah Mizoram sawrkar hmalakna a that thu leh lawmawm a tih thu a sawi.

Mizoram-a rawn zin Pankaj Kumar Singh hian Mizoram hmun hrang hranga sawrkar hmalakna ni 3 chhung a tlawhkual hnuah Inrinni zing khan Deputy Chief Minister Tawnluia chu a chenna In ah a kawm a, Deputy Chief Minister hian Joint Secretary chu lo lawmin Mizoram-ah ngei rawn kala hmalakna te a rawn en chu fakawm a tih thu a sawi a, hetiang taka rawn ngai pawimawhtu hi an tam thin lo hle tih sawiin, a deparment chan hnuaia sawrkar laipui Scheme hrang hrang chungchangte leh hmalak chhunzawm dan turte a sawipui a ni.

Joint Secretary Pankaj Kumar Singh pawhin Mizoram sawrkarin a lo dawnsawn danah lawmthu sawiin, Mizoram chhunga a Department chan hnuaia hmalakna te a theih ang anga chipchiara a tlawh thu leh a hmuh tawh chinah sawrkar hmalakna a that thu leh lawmawm a tih thu a sawi a. Mizoram chu nuam a tih thu leh hmalakna hrang hrangte a taka a hmuh chuan Delhi tlang atanga an lo ngaih ang ngawt a nih loh thu sawiin, amah pawhin hlawkthlak a tih thu a sawi a, hmalak mekna te a hlawhtlin vek theih nan theihtawp a chhuaha a ngaihven zui tur thu sawiin, Deputy Chief Minister leh Department hotuten rawtna chi hrang hrang an thlente chu theihtawp chhuaha a bawhzui tur thu a sawi bawk.

Pankaj Kumar Singh hi India hmarchhaka Urban Schemes leh Programmes te vil tura ruat niin, April ni 13, 2022 khan Aizawl a lo thleng a, a cham chhung hian PHE Department, UD&PA/SIPMIU hmalakna chi hrang hrang a tlawh a, chung zingah chuan Zuangtui-a PHE Department Biodigester Plant, UD&PA (SIPMIU) in Bethlehem Vengthlang a Aizawl Veng 16 in an hman tur 10 MLD Sewage Treatment Plant sak mek, Dihmunzawl-a Greater Aizawl Water Supply Phase I & II-in chak zawka tui a pumpt theihna tura 132kV Sub-Station bun mek, MINECO 10% Lump sum Scheme hnuaia building sak chi hrang hrang, Industrial Growth Centre, Sakawrtuichhun-a SIPMIU-in NERUDP programme hnuaia 37 MLD Water Treatment Plant a siam mek te bakah Kolasib-a 10% Lump sum Scheme hnuaia hmalakna hrang hrang - Bridg. C. Vankunga Building Shopping Complex, Diakkawn, Kolasib Stadium bakah Kolasib leh a chhehvela kawng sial te a tel a ni.

PHE Department leh UD&PA Official te nen inkawmhona neiin sawrkar laipui hnuaia an Project/Scheme thawh chi hrang hrang report felfai taka an pe thei chu lawmawm a tih thu sawiin, Inrinni vek khan Mizoram chhuahsanin New Delhi a pan a ni.

Comments

Popular News (Last 30 Days)

LPG man bithliah thar