Union Minister rawn zin

Ports, Shipping & Waterways changtu Union Minister Sarbananda Sonowal chuan zankhat riak turin nimin khan Aizawl a rawn thleng a, nimin vek khan Mizoram chhunga lui liante cheibawl a, inkalpawhna Inland Waterway siam dan tur sawiho a ni.

He sawihona SAD Conference Hall-a neih ah Sarbananda Sonowal chuan Mizoram chhunga lui hmanga inkalpawhna (inland waterways) siam a nih theih nan Sawrkar Laipui leh Mizoram Sawrkarin thawhhona tha zawk an neih theihna tur ngaihtuah ho a nih thu a sawi a. Mizoram Sawrkarin hma a lak tawhna leh project hrang hrang an neih te uluk taka a ngaihthlak thu leh heng hmalakna hrang hrang te hi reilote ah tha taka bawhzui a, bungrua leh khualzin mite phurhna turin tangkai taka hman thuai theih a nih a beisei thu a sawi a ni.

He hunah hian Transport Secretary KT. Beichho chuan Mizoram Sawrkarin Inland Waterways Project hrang hrang a neih te tarlangin, Khawthlanngtuipui (Karnaphuli) - Tuichawng (23 kms) atana DPR thehluh chu Sawrkar laipui in a pawm tawh thu te, a thawhkhatna atan Central Sector Scheme hnuaiah cheng vbc. 6.17 ruahman a nih thu te, advance installment cheng vbc. 1.23 chu Mizoram Sawrkar sumbawma a luh thuai theih nan January 12, 2022 khan Chairman IWAI hnenah ngenna thehluh a nih tawh thu a sawi bawk.

Tlawng lui-ah Khamrang khua atanga Assam State chhung Gharmura kalpawh theihna tur KM 87.136-a thui siamna turin survey neih a ni tawh a, he survey report atang hian DPR siam niin IWAI Chairman hnenah thehluh a ni tawh bawk a. Tuipui D atanga Lomasu inkalpawhna tur KM 138.26-a thui chu Final Proposal thehluh hmabak a ni a. Khawthlangtuipui-ah Rajivnagar khua atanga Tuichawng khua (128.08km) inkalpawhna tur proposal thehluh a ni tawh bawk.