Myanmar atanga raltlante mangang leh harsa lova an awm theih nan theihtawpin hmalak a ni
Chief Minister Zoramthanga chuan Myanmar tualchhung buaina avanga Mizorama raltlante mangang leh harsa lova an awm theih nan theihtawpin hma an la tih sawiin, harsatna bik a awm a nih chuan ama hnenah direct-a thlen thin turin MLA te chu a chah.
Nimin-a Mizoram Legislative Assembly inkhawm ah Congress Member, Lalrindika Ralte zawhna leh Palak bialtu MLA, KT. Rokhaw te zawhbelhna a chhannaah Chief Minister chuan kumin March ni 12 thlenga Myanmar atanga Mizoram-a raltlan awm zat Sawrkar chhinchhiah chu mi 24,289 an ni tih a sawi a. Raltlan hi an lo luh belh zel avangin eng zat chiah nge an awm hriat hleitheih a ni lova, tunhnaiah Chin Hills atanga lo kal an tam chak zual tih a sawi a. An lo hriat dan chuan Myanmar Sipai sawrkar khian hmundang aia Chin Hills-ah inkahna leh buaina a chhuah tam zawk chhan hi eng vang nge tih leh engtin nge an tihtawp theih ang tih an ram-a Under Ground Group hrang hrangte a sawipui a. Sipai Sawrkar pawhin Chin Hills-a inkahna a tam bik hi an manganpui hle a ni, a ti. Chief Minister Zoramthanga chuan, Myanmar atanga raltlante tanpui tur hian tlang takin Sawrkar laipui an nawr a, amaherawh chu India chu Signatory a nih lohna lai subject anih avangin Direct taka puih a rem loh avangin Sawrkar laipuiin Mizoram a rawn tanpui a, an ni in raltlan an tanpui ve thung tih a sawi a. Raltlan lo dawnsawn kawngah Sawrkar, NGO, Kohhran, zirlai leh mipui nen an phek tan a, fak pawh an hlawh a, lawmthu an dawng mawlh mawlh a ni ber tih a sawi.
Chief Minister Zoramthanga chuan raltlan rawn lut te zingah tanpuina dawng kim lo an la awm tih pawh sawiin, a chhan chu Camp hrang hranga awm an nih bakah lo zin bo te an awm ve bawk vang a ni tih a sawi a. Tunah hian DC leh Committee siamte hnenah pawisa pe zel a, mangang lo leh harsa lova an awm theih nan theihtawpin hma an la tih sawiin, harsatna bik a awm a nih chuan ama hnenah direct-a thlen thin turin MLA te chu a chah a. A tul a nih chuan India Sawrkar hnenah tanpuina dil zel a nih tur thu a sawi bawk.
(El-a)