Vawk hri leng Calamity-ah puang thei dawnlo

Mizoram sawrkar chuan COVID-19 hripui leng avangin Vawk hri leng, African Swine Fever (ASF) chu nunphung tikhaihlaka chhiatna thleng (calamity)-ah a puang thei dawn lo.

AH&Vety Department chuan Mizoram-a Vawk hri leng mek avanga Vawk thi neitute'n State Disaster Response Fund (SDRF) atanga chhawmdawlna an hmuh theih nan ASF chu calamity-a puang turin Disaster Management & Rehabilitation (DMR) Department-ah dilna an thehlut a. DM&R Secretary Vanlalngaihsaka chuan thuthar thehdarhtute zawhna chhangin ASF avanga Vawk thi neitute chhawmdawlna pek duh mah se, SDRF sumin a daih dawn loh thu a sawi a, “SDRF-a kan sum neih mek zinga 50% chu sawrkar laipuiin COVID-19 zangnadawmna leh a kaihhnawihah hman min phalsak a, a la bâng 50% dang chu chhiatna thleng hrang hrang atan hman tura dah a ngai,” a ti a. “Tuna Mizorama Vawk thi te rate hrang hrang atanga kan chhût khan SDRF-a sum hman theih la awm 50% hian a daih dawn loh bakah, kângmei, leimin leh chhiatna hrang hrang a awm palha hman tur dah a ngai a ni,” tiin sum in a daih dawn loh avangin ASF chu Calamity-ah sawrkarin a puan theih loh thu a sawi a ni.

ASF hi Mizoram-a khaw 271 zet-ah a leng tih finfiah ni tawhin Vawk 29,686 zet a thi tawh a, Vawk 10,380 suat a ni tawh bawk a ni.

Comments

Popular News (Last 30 Days)

Serchhip DCSO sawn a ni