Chanchin thar thenkhat :

Aizawl-ah DC hovin sawiho

Sawrkar Laipui hnuaia Ministry of Tribal Affairs Scheme, Special Central Assistance for Tribal Development, Aizawl District a kalpui tura din District Planning & Monitoring Committee (DPMC) chu niminpiah khan Aizawl DC Conference Hall-ah Aizawl DC Dr. Lalhriatzuali Ralte hovin an thukhawm a. Special Central Assistance for Tribal Development (SCA for TD) hi Central Sawrkar hnuaia Ministry of Tribal Affairs Scheme a ni a, he Scheme hnuaiah hian Central Sawrkar sum hmangin Central Sawrkar in Mizoram-a thingtlang khua thlan bik 344-ah tun Sawrkar kum kal mek leh kum 5 dang lo la awm tur atana hmasawnna hna thawhna tur Scheme a ni. SCA for TD hnuaiah hian khaw thlanbik ten kum khat-ah cheng nuai 20.38 hmasawnna hnathawh nan an dawng thei dawn a, he Scheme hnuaiah hian Aizawl District-ah khaw 40 te chu tun sawrkar kum atanga kum 5 dang lo awm tur atan thlan an ni.

Aizawl West-II bial tlawh

I&PR Department changtu Minister leh Ai-zawl West-II bialtu MLA Lalruatkima chuan nimin zing khan a bial chhunga Tuikual North a tlawh a, khawtlang hruaitute nen inkawmna an neih ah hripui leng karah theihtawpin sawrkar in hma a la zel tih sawiin, tunah chuan hri pawhin ziaawm lam a pan ta mek a. Chak lehzualin hma-sawnna hna pawh a thawh theih ngei a beisei thu leh kum tharah kuthnathawktute hnen SEDP in a thlen ngei theih nan Chief Minister Zoram-thanga hovin hmalak mek zel a ni tiin a sawi bawk.

MLA lakluhna nei dawn

Tunhnaia 4-Tuirial (ST) Assembly Constituency bye-election neih zawh taka MLA atana thlantlin K. Laldawngliana chu Vawiin chawhma dar 10:30 hian rinawmna thu tiam tirin MLA atana lakluhna inkhawm neih a ni dawn a, MLA lakluhna inkhawm hi Assembly Conference Hall, Assembly Annexe Building-ah neih tur niin Cable TV lamah live telecast a ni ang.

MSO dincham lawmna nei

Mara Students' Organization (MSO) chuan nimin khan aan dinchampha vawi 56-na lawmna Circuit House Siaha-ah neiin he hun hi MSO Pre-sident hma ber leh Minister hlui S. Hiato bakah hruaitu hlui dang ten an hmanpui a. He hunah hian S. Hiato chuan kum 1965-ah Shillong-ah Mara Students' Organization an din tih sawiin, a din champha lawmnaa a tel ve thei chu lawmawm a tih thu a sawi. Kan ram leh hnam tan ngaihtuahna seng tur leh zirlai pawl an nih anga zirlaiten hlawh-tlinna duhawm zawk an neih theih nan hma la chhun-zawm zel turin a fuih a. Mizoram-ah sawrkar hnuaiah hna-a luhna tur a van tawh avangin Central Service-ah Mara thalaite an luh theih nan theih-tawp chhuaha hma la turin a fuih bawk. MSU dincham lawmna hi hri leng avanga mi tam tak tel theih a nih loh avangin hruaitu lo ni tawh te an tel a ni.