Kumin ah Malaria hrik pai hmuhchhuah pung nasa

Kumin January thla atanga September thla tawp thleng khan Serchhip District-ah mi 24,262 te thisen enfiah atangin Malaria hri kai mi 42 hmuhchhuah an ni a, Malaria vanga thi mi 2 an awm bawk.

Serchhip CMO Office atanga thu kan dawn danin kumin hian Serchhip District-ah Malaria hri kai hmuhchhuah hi nasa takin an pung a, kumin January thla atanga September thla thleng khan mi 24,262 te thisen enfiah atangin Malaria hrik pai 42 hmuhchhuah niin heng te hi PF 23 leh PV 19 te an ni a, Malaria vanga boral mi pahnihn awmin Keitum leh Thenzawl khua ami te niin heng te hi Malaria PF ve ve an ni.

Kum kalta (2020) January atanga September thla chhung khan Serchhip District-ah hian mi 20,426 te thisen enfiah atangin Malaria hrik pai 18 hmuhchhuah an lo ni tawh a, PF 8 leh PV 10 niin, kumin hian Malaria hrik pai hmuh-chhuah hi a let aia tamin an pung a, nikum lamah Malaria vanga thi an awm loh laiin kumin ah mi 2 an boral ta bawk a ni.

Serchhip CMO Office-a thawk te chuan kumin a nasa taka Malaria hrik pai hmuhchhuah an pun avang hian kawng hrang hranga hma an lak thu sawiin, Awareness Campaign te pawh hmun hrang hrangah neiin mipuite hnenah thuziak te pawh an sem thu an sawi a, ram-a riak thin loneitute pawh an Thlam-ah te kalchilhin Thosilen te an chiah sak bakah zirtirna te pein aurinna leh TV bakah chanchinbu ah te pawh mipuite zirtirna hi tihchhuah a nih thu an sawi a ni.

Comments

Popular News (Last 30 Days)

Serchhip DCSO sawn a ni