Vawiin-ah Vote tla chhiar dawn

Tuirial Bial Assembly bye-election neih a Vote tla te chu tukin dar 8:00 atang hian chhiar a ni dawn ta a, result pawh puan nghal a ni ang. Tuirial bialtu MLA Andrew H. Thangliana a boral avanga he bial ruak hnawhkhahna tur hian Inrinni khan mipuite chuan Vote an thlak a, tlung taka Vote thlak hi zawhfel a nih hnuah inthlanna atana hman EVM te chu venhimna hnuaiah dah nghal niin tukin dar 8:00 atangin Govt. Kolasib College-ah Vote tla te hi chhiar tan a ni dawn a, rua-hman lawk ang chuan Dawhkan pasarih-ah Vote tla te hi chhiarin Round li-ah chhiar zawh theih a ni dawn a ni.


CM in CIC thar lalut

Mizoram State Chief Information Commissioner thar atan ruat Lalnunmawia Chuaungo chu nimin khan Chief Minister Zoramthanga chuan Mizoram Assembly House Conference Hall-ah rinawmna thu tiam tirin a lalut. Mizoram State Chief Information Commissioner thar Lalnunmawia Chuaungo hi March 1, 1962-a piang niin kum 1987 kha Indian Administrative Service (IAS) a zawm a. Gujarat Cadre niin, kum 2019 khan Inter-Cadre Deputation in Mizoram Chief Secretary ah dah a ni a. October ni 29, 2021 khan voluntary retirement in service hi a chhuahsan a, Mizoram State CIC atan thla hmasa khan ruat niin nimin khan lakluh a ni ta a ni.


Luidung nungcha zawrh enfiah

Mizoram sawrkarin Luidung nungcha la puitling lo (Juvenile) man phallohna thupek a chhuah tawh bawhzuiin nimin khan Fisheries Department hnuaia Fisheries Enforcement Team, Aizawl District te chuan Sialsuk tlangdung leh a chhehvel a Luidung nungcha zawrhchhuahte an enfiah a, hei bakah hian Samlukhai a Chakai man thin te kokhawmin Luidung nungcha la puitling lo an man chuan an manna hmuna chhuah leh ngei tur leh Luidung nungcha te inthlahpung hmana an zuah chuan a mantu leh zuartu tur te'n an hlawkpui zawk zel tur thu te an hrilhfiah bawk a ni.

Comments

Popular News (Last 30 Days)

Serchhip DCSO sawn a ni