Latest News

Rajya Sabha MP in Model Village atana a thlan N. Mualcheng-ah Model Village hawn a ni

Sansad Adarsh Gram Yojana (SAGY) hnuaia Mizoram Rajya Sabha MP K. Vanlalvena'n Model Village atana a thlan, Mualcheng khua 'Model Village' atana hawnna chu nimin, Oct. 5, 2021 khan neih niin Serchhip District Bawrhsap Kumar Abhishek chuan Model Village hi a hawng a ni.

Mualcheng Community Hall-a 'Model Village' hawnna hun hi East Lungdar BDO, H. Lalhruaitluanga chuan kaihruaiin SAGY Model Village hawngtu District Bawrhsap chuan Rajya Sabha MP K. Vanlalvena'n N. Mualcheng khua SAGY Model Village atana a thlang chu lawmawm a tih thu sawiin, Model Village hmalakna hrang hrangte a hlawhtlin theih nan thil pawimawh pathum a awm tih a sawi a. Chungte chu- a bulthut zirchianna rintlak (baseline survey), zirchianna dika innghat Village Development Plan tha leh chung Plan te a hlawhtlin ngei theih nana hnathawh zui a ni, a ti a. Heng thil pawimawh pathumte hi Line Department zawng zawngten theihtawp chhuaha bawhzui tur leh thawhhona tha tak nena engkim kalpui turin a chah a. District Bawrhsap nihna atanga lo tih ve theih a neih apiangte theihtawp chhuahin a lo bawhzui ve zel thin dawn tih sawiin, he Model Village hi hlawhtling takin a kal ngei tur a ni, tiin SAGY Model Village hi a hawng a ni.

He hunah hian District Panchayat Resource Centre (DPRC) Serchhip-a Head Faculty, Vanlalhruaia chuan Sansad Adarsh Gram Yojana (SAGY) chungchang sawifiahin SAGY chu India Hnam pa, Mahatma Gandhi hmathlir, thingtlang khua te a bika enkawla kawng hrang hranga hmasawnna kalpuina tur atanga lo chhuak a ni tih a sawi a, kum 2014 October 11 khan India Prime Minister in hawngin Mizoram-ah pawh hemi kum November 19-ah bultan a nih thu a sawi a. Model Village chu duhsakna, a bika sum leh pai luanluhna tur a ni lo tih sawiin, ruahmanna felfai leh rintlak, hmalakna mumal leh tha, langtlang taka thawhhona hmun a nih avanga entawntlak (Model) a ni tur tih a sawi a. Amaherawh chu Central sawrkar hnuaia Scheme hrang hrangte chu heng SAGY Model Village te tan hian ngaihpawimawh hmasak thin tur anih avangin SAGY Model Village nih chu kawng tinrengah a hlu hle a ni, a ti bawk.

Serchhip District chhunga awm N. Mualcheng khua ah hian chhungkaw 305 awmin mihring 1686 an cheng mek a, nimin-a Line Department hrang hrang aiawhten thusawina hun hmangin SAGY kalphung hrang hrang an tarlang a, Vawiin hian SAGY leh a kaihhnawih hriattur hrang hrangte inzirtirna buatsaih zui leh a ni ang.

Comments

Popular News (Last 30 Days)