Lirthei Accident thlen dan leh thlen chhan hriat theihna tur iRAD Project hawn a ni

Lirthei chetsualna a lo awm thulha chetsualna a lo thlen dan leh a thlen chhan te kimchang takin hriat theihna tur Integrated Road Accident Database (iRAD) Project chu chu nimin khan Home Minister Lalchamliana chuan a hawng.

Integrated Road Accident Database (iRAD) Project hian Mizoram Police, Health & Family Welfare, PWD, Transport Department leh NIC te a thlun zawm a. Lirthei chesual an awmin iRAD hmang hian chetsualna a lo thlen dan leh a thlen chhan te kimchang takin hriat theih a ni dawn a, hei hian kawngpui himna tura hmalakna tha zawk a siam dawn a ni.

He Project hawnna hun DGP Conference Hall, Aizawl-a neih ah hian Home Minister chuan Integrated Road Accident Database (iRAD) Project chu India sawrkar hnuaia Ministry of Road Transport & Highways in a kalpui a nih thu leh Mizoram kawngpui enkawltu PWD te pawhin an chhawr tangkai dawn hle nia sawiin, kawngpui te pawh tun aiin lirtheia veivak te tan a him chho dawn tih a sawi a. Lirthei chetsualna thlen chhan tam zawk chu pumpelh theih leh a khalhtute fimkhur tawk loh avanga thleng a ni tih sawiin, lirtheia chuangte nunna kawltu emaw tih turin lirthei khalhtute mawhphurhna a sang a. Chuvangin lirtheia veivak te himna tur chuan lirthei khalhtute an pawimawh ber a ni tih erawh kan hriat tlan a tha a ni, a ti a, Mizoram-a iRAD Project hman a ni ta chu lawmawm a tih thu a sawi bawk.

Integrated Road Accident Database Project hi Mizoram-ah pawh India ram hmun thenkhat angin September 15, 2021 khan hman tan a nih tawh thu sawiin Home Minister chuan, iRAD project hian India rampum-a accident data dik leh rintlak neih a, chu data chu zirchian a, ram chhunga motor accident chhan leh a tihtlem dan kawngah nasa takin a puih tur thu a sawi bawk.

He hunah hian iRAD hman tan, September 15, 2021 atanga nimin thleng khan Mizoram chhungah Road accident case 17 chu iRAD app-ah ziahluh tawh a nih thu tarlan a ni.