Latest News

Hri leng dona kawnga rawtna siam hrang hrang sawrkar in pawmin inkharkhip puan tawhloh rawt a ni

 Health Secretray R. Lalramnghaka chuan, State Level Expert Team on COVID-19 Management Team chuan COVID-19 hrileng karah nunphung pangngai zawh zir a ngaih thu leh inkharkhip ang kalphung hi tih tawh loh ni se tia sawrkar-a an rawtna sawrkarin a pawmpui thu a sawi.

Nimin-a I&PR Auditorium, Aizawl-a State Level Expert Team on COVID-19 Management-in an rawtna (recommendation) sawrkara an thehluh sawifiahna an neihah Health Secretary chuan State Level Expert Team on COVID-19 Management chuan Lockdown-in hripui a tihrem chuan loh avangin tul bik thil engemaw vang tak a awm a nih loh chuan inkharkhipna (Total Lockdown) puan tawh loh an rawt tih sawiin, an rawtna hi sawrkarin a pawm thu a sawi a. Mithiamte'n a an zirchianna atangte, India State dangte tihdan phung ngun taka zirna atang te, khawvel ram dangin an tihdan phung te ngun taka zirchianna behchhana Expert Team in sawrkar-a inkaihhruaina dan thar an siam chu thlenin pawm a ni tawh tih a sawi a. “Hripui leng avanga inkhuahkhirhna chu zau zawk leh fimkhur zawk kalpui a tul a, inthlahdul tih hian phal zau lam ni lovin, COVID-19 kara nun kawng leh nunphung pangngai te pawh pawh kan zir chhawm chho zel ang,” tiin, engemaw chen chu he hri hi awm reng tawh tur ngaih a nih thu pawh sawiin, “Inthlah dah lova kan taksa tih chak leh hriselna lama hmalak a pawi mawh chho dawn a. Mahni hriselna ngaih pawimawh hi a tul ber tawh dawn a. COVID -19 vaccine la tawhte tan chuan a hlauh awmna hi a nep tawh hle,” a ti bawk.

State Level Expert Team on COVID-19 Management-a Convener Dr. F. Lallianhlira chuan September ni 23-a din Expert Team-in sawrkara an rawtna thlen hrang hrang sawi fiahin, Mizoram atanga rawn lut tur khualzin te RAgT Test-a negative te reng reng chu inkhung ngai lovin, fimkhur taka CAB zawm tur a nih thu a sawi a. Symptom an neih phawt chuan RT-PCR/TrueNat hmanga test leh thuai tur an nih thu leh an negative a nih pawhin ni nga (5) chhung quarantine a, RT-PCR/TrueNat hmanga test ve leh vek tho tur an nih thu a sawi bawk.

Tunah chuan COVID-19 natna lang-chhuak bakah inendik tura hriselna lama thawktu ten an tih leh hri vei nena inhnimhnai zual te chauh endik an ni tawh dawn a, hri avanga nunna chan hming te chu puanzar a ni tawh lovang. Hei bakah hian hri vei enkawlna damdawi In thuam chak kawngah chak taka hma lak a ni dawn tih an sawi a, District tinah COVID-19 Care Wing din anih dawn bakah Lunglei District Hospital atan ICU Khum 10 dah tum ani bawk. 

Health Secretary R.Lalramnghaka chuan miin COVID-19 a kai atanga ni 30 ral-hmaa a boral a nih chuan COVID-19 vanga thi-a chhiar tur a nih thu leh ni 30 hnua damdawi In-a inenkawl chhunzawm zel ngai thi te pawh COVID-19 vanga thi-a chhiar tur an ni tih a sawi bawk.

Rapid Antigen Test (RAgT) chungchang zawhna chhangin Dr. Rosangluaia chuan, “RT-PCR hian zaa za hri hi a hmu bik lo a, symptom nei lo angah hmuh hmaih a ngah ve tho a. Symptom neiah chuan RAgT leh RT-PCR te hian hmuh an ngah a. Chuvangin, mipuiah hian kan sawi duh pakhat ah, RT-PCR test zawng zawng hi positive hri kai ngei pawh a hmu vek bik lo tih kan inhrilh a ngai a ni. RT-PCR test-a him tawk tih ngawt kha zaa za a him bik lo,” a ti a. “Amaherawh chu, RT-PCR ai chuan RAgT in a hmuchhuah zat a hniam hret a ni tih kan hriat a ngai a. Mahse, khawvel pumpuia an hman avangin a dik lo hulhual tih erawh chu a dik thei hauh lo a. Tuna kalpui danah chuan symptom an neih chuan RAgT in awlsam taka a hmuh theih a, Test-a a negative chuan RT-PCR in chhunzawm nghal vat tura tih niin, tuna sawrkara thil kallai mek leh kan kalpui dan a ni,” a ti bawk.

Comments

Chhiar Hlawhte