Mizoram-a infiammi 2005 te hnenah Incentive Cash Award cheng nuai 120 chuang semchhuah a ni

Sports & Youth Services Department buatsaihin nimin khan Aijal Club-ah infiammi thlan bik mi 2005 te hnenah Incentive Cash Award hlanna buatsaih a ni a, he hun hi Chief Minister Zoramthanga chuan khuallian nia hman-puiin he hunah hian cheng nuai 120 chuang semchhuah a ni.

Nimin-a he hun hmanna ah hian Chief Minister chuan Sports lama hmasawnna hi hnam changkanna tehfung pakhat a nih thu sawiin, Pianphung a chak leh thei hrim hrim chu awm mahse ram leh hnam changkanna lantirtu pakhat a nih thu a sawi a. Mihring inkarah inkawmngeihna boruak siamtu, taksa hriselna thlentu a nih bakah ram leh ram inkara inelna te hian innelna a siam thu sawiin, Sports hian inpumkhatna tha tak a siam thu a sawi a. Infimmi te chu zuk leh hmuan leh ruihtheih thil laka fihlim a pawimawh thu a sawi bawk.

Assembly Speaker Lalrinliana Sailo chuan infiammi te tiphur tura Cash Award sawrkarin a ruahman chu tha a tih thu sawiin, Acts leh Rules te chu a taka kalpui zuina a awm loh chuan awmzia a awmloh thin thu leh, Dan siam sa anga sem a ni chu lawmawm a tih thu a sawi bawk.

Nimin-a he hun hmanna ah hian Sports Minister Robert Romawia Royte chuan Incentive Cash Award sem dan sawifiahin, tun tumah hian kum 2008 atanga inelna a tel te a huam thu leh hei hi Rules anga Award dawng thei zingah chhan hrang hrang avanga dawng velo leh lo dil lo te an awm vang a nih thu a sawi bawk.

Tun tumah hian kum 2008-2019 chhung atan infiammi 411 te hnenah Rs. 37,10,350/- semchhuah niin kum 2018-2019 atan infiammi 1075 te hnenah Rs. 48,09,800/- semchhuah a ni a, kum 2019-2020 atan mi 519 te hnenah Rs. 35,67,300/- semchhuah ni bawkin a vaiin infiammi 2005 te hnenah Rs 120,87,450/- semchhuah a ni.

Tun tumah hian mimal-ah Jeremy Lalrin-nunga (Weight Lifting) chuan dawng hnem berin Rs. 4,25,000/- a dawng a, Jeje Lalpekhlua (Football) Rs. 1,80,000/- leh H. Lalruatfeli (Hockey) Rs. 1,61,000/- te chu a dawng tam zual an ni.