Mizoram-ah hri kai 61,992 hmuhchhuah an ni tawh

Mizoram-ah COVID-19 hri kai 61,992 hmuhchhuah an ni ta a, niminpiah khan Sample 6491 enfiah niin heng atang hian hri kai 882 hmuh niin Sample enfiah atanga za zela 13.59 te chuan hri hi an kai a ni.

Niminpiah khan ZMC-a RT-PCR Laboratory-ah Sample 1101 enfiah ni lehin heng atang hian hri kai mi 203 hmuhchhuah an ni a, an vai hian Aizawl District-a Sample lak vek niin Thuampui-ah hri kai mi 22 zet hmuh leh an ni a, Salem Veng-ah pawh hri kai 21 hmuh niin Dawrpui Vengthar-ah hri kai 19 hmuh an ni a, a bak hi Veng leh khua 31 ami niin Veng leh khua hriatloh mi pakhat a awm bawk. Hei bakah hian Fluorescent Immunoassay (FIA) Test hmangin Sample 19 enfiah niin hri kai 15 hmuhchhuah an ni bawk a, an vai hian Aizawl District ami vek an ni.

Niminpiah khan District hrang hranga TrueNat Laboratory-ah Sample 394 enfiah niin hri kai mi 51 hmuhchhuah an ni bawk a, an zinga mi 27 te chu Champhai District ami te niin an vaiin Champhai khua an ni a, Mamit District-ah hri kai mi 10 hmuh niin Lawngtlai District-ah 7, Lunglei District-ah 5 leh Khawzawl District-ah hri kai mi 2 hmuh an ni.

Rapid Antigen Test hmangin niminpiah khan Sample 4977 enfiah ni bawkin hri kai 613 hmuhchhuah an ni bawk a, an zinga 252 te hi Aizawl District ami te niin Veng khat-a hri kai mi 10 chin chunglam hmuhchhuahna Veng 7 an awm a, a bak zawng hi Veng leh khua 64 ami an ni. Heng bakah hian Kolasib District-ah hri kai mi 97 hmuh niin Bilkhawthlir-ah 28 leh Saipum-ah 23 hmuh an ni a, Lunglei District-ah hri kai 88 hmuh niin Champhai District-ah 39, Lawngtlai District-ah 38, Siaha District-ah 32, Mamit District-ah 28, Khawzawl District-ah 20, Serchhip District-ah 16 leh Hnahthial District-ah hri kai mi 3 hmuhchhuah an ni bawk.

Mizoram-a COVID-19 hri kai zingah nimin khan mi 373 te chu anmahni enkawlna hmun atanga chhuahtir ni ve leh bawkin heng te nen hian nimin tlai dar 5:00 thleng khan Mizoram-a hri kai mi 51,763 te chu enkawl dam an ni tawh a, hei hi hri kai hmuhchhuah atanga chhutin za zela 83.50 niin hri kai enkawllai chu mi 10,010 an tling leh tawh bawk a. Nimin tlai dar 5:30 khan R. Lalmuana (70), Zuangtui chu ZMC-ah boral ve lehin Mizoram-a COVID-19 hri kai boral chu mi 220 an tling ta bawk.