Latest News

Cheng nuai 468.81 senga Bawngchawm tlang-a Integrated Tourist Circuit sak CM in a hawng

Serchhip Bawngchawm tlang Paragliding hmun behchhana Integrated Tourist Circuit sak thar chu nimin khan Chief Minister Zoramthanga chuan a hawng a. Integrated Tourist Circuit hi North Eastern Council (NEC) sum cheng nuai 468.81 hmanga sak niin Mizoram Aero Sports Association (MASA) ten a sak hna hi an thawk a ni.


Integrated Tourist Circuit hawnna hunah hian Chief Minister Zoramthanga chuan Paragliding hmun ngelnghet leh a behbawm hrang hrang, khualzin hip theitu hmun tha tak ruahman a ni chu lawmawm a tih thu sawiin, Mizoram leh a bikin Serchhip khaw mipui tan kawng hrang hranga hlawkna thlentu a nih a rin thu a sawi a. Tourism tihhmasawn zelna turah hmathlir thui tak nei chunga ruahmanna siam a pawimawh thu a sawi bawk. Chief Minister chuan Mizoram chu kawng hrang hranga hmasawn theihna nei a nih thu leh, chu hmasawnna thlen tur chuan rilru zau tak nen taihmakna nen bawhzui a ngaih thu a sawi a. Tun tuma hawn tak Tourist Circuit angah leh hmasawnna ruhrel dang din turah ngaihtuah pawimawh tak pakhat chu Tui hnar a ni tih sawiin, hemi atan hian ruahtui dawnga Tui tam tak dahkhawlna thamna tur ruahman tha a tih thu a sawi a, India sawrkar pawhin tunah chuan a thupui ber pakhat chu ‘Catch the Rain’ tih a nih thu a sawi bawk.

He hunah hian Khualzahawm Tourism Minister Robert Romawia Royte chuan Adventure Sports-ah Mizoram chauh nilo, North East India leh India ram in bung thar a kai ta tih sawiin, International Event thleng zel thei tura hmathlir nei turin MASA leh Serchhip District hotute chu a chah a. Tourism lama Mizoram tihhmasawn zelna turah Minister Robert Romawia Royte chuan sawrkar tih turah chauh dah lova Private lamin an ngaihsaka hma lak nachang an hre thar zel chu lawmawm a tih thu leh, a nachang hre belh hlawm zel ila a duh thu a sawi bawk.

Serchhip bialtu MLA leh he huna Khual-zahawm ni bawk Lalduhoma pawhin Integrated Tourist Circuit chu Paragliding atan World Class Flying Site a nih mai bakah khawvela thlawhna hmun him bera vuah a ni chu lawmawm a tih thu a sawi a. Paragliding lamah thalaite an lo tui thar a beisei thu sawiin, helai hmun hian nakin zelah eizawnna kawngah pawh Serchhip tan rah tha a chhuah ngei a beisei thu a sawi bawk.

He hunah hian a bika sawm Adviser to Chief Minister, C. Lalramzauva pawhin MASA hmalakna chungah lawmthu sawiin, India leh ram dang atanga Paragliding a tui mite fuankhawmna tur hmun tha siam puitlin a nih theih nana NEC leh Tourism Department hmalakpuina chungah lawmthu a sawi a. NEC Adviser (Banking, Industries and Tourism) Er. R. Lalrodingi pawhin Project hmalatuten a hun tuk chhung aia hmaa an sa zo chu fakawm a tih thu a sawi bawk.

Integrated Tourist Circuit hi Serchhip atanga chhimlam KM 3 vela awm niin a panna kawng hi motor lian kal theih (Truckable)-in siam a ni a. Mikhual 30 chuang thlen theihna tura ruahman niin Room tin hi Bathroom nena thuam vek a ni a. Khualzinte tana lirthei dahnaah harsatna awm lo turin lirthei 20-25 dah theihna tur hmun siam a ni bawk.

A Building hi Mizoram-a Green Building hmasa ber a ni a, Pre Engineering Building (PEB) leh Light Gauge Steel Frame (LGSF) te siam niin Bang (wall) atan Cement Fibre Board hman a ni a, a bang karah hian Rock-Wool dah a ni bawk a. Hei hian sik leh sa lakah a chhung boruak chu danglam lutuk lovin a vawng thei dawn a, a Building hi lirnghing na tak 7 Magnitude pawh dawl zo tura duan a ni bawk.

He Project atana senso zawng zawng hi cheng vbc. 4.68 chuang hret a ni a, North Eastern Council (NEC)-in a vaia a tum vek niin Mizoram Aero-Sports Association (MASA) in a buaipui a ni.

Comments

Popular News (Last 30 Days)