Latest News

Kum khat chhungin Serchhip-a TrueNat Laboratory-ah COVID-19 hri kai 212 hmuh an ni

Serchhip District-a COVID-19 hri kai hmuhchhuahna tura TrueNat Laboratory hawn a nih atanga kum khat chhungin he khawl atang hian COVID-19 hri kai mi 212 hmuhchhuah an ni tawh.


COVID-19 hri leng avanga harsatna a thlen hnuah Mizoram sawrkar chuan hri kai te awlsam leh chak zawka hmuhchhuah an nih theihna turin Mizoram District hrang hrangah TrueNat Quattro RT-PCR bun tur hian hma la in Serchhip District a hman tur khawl pawh nikum August 13 khan Serchhip rawn phurhthlen a ni a, he Laboratory bunna atan hian District Hospital in Laboratory a neih mek chu hman theih a nih loh avangin OPD Building hnuaia Room thenkhat chu siamremin Laboratory hi siam thar a ni a, August 26, 2020 khan Mizoram sawrkar aiawh ten an enfiah hnuah September ni 1, 2020 khan ICMR chuan hman phalna a rawn pe leh a, nikum September 10 khan District Bawrhsap Kumar Abhishek chuan he Laboratory hi hawngin hemi ni hian Sample 9 enfiah nghal a ni a, hemi atanga kum khat a liam hnu, nimin thleng khan Sample 4855 enfiah ni tawhin heng atang hian COVID-19 hrikai mi 212 hmuchhuah an ni tawh a ni.

Serchhip CMO Office atanga thu kan dawn danin Serchhip District-ah hian nikum June 6 khan COVID-19 hri kai hi hmuhchhuah tan niin a tir lamah Serchhip District atang hian hri kai te hi hmuhchhuah theih a nih loh avangin Sample an lak te chu ZMC-a RT-PCR Laboratory-ah enfiah tura thawn a ni thin a, nimin thleng khan Serchhip District atanga Sample thawn zingah RT-PCR Laboratory atang hian COVID-19 hri kai 122 hmuhchhuah an ni tawh bawk a. Serchhip District-a TrueNat Laboratory-ah hian hri kai mi 212 hmuhchhuah an ni tawh bakah Rapid Antigen Test hmangin hri kai 1016 hmuhchhuah an ni tawh bawk a, heti hian Serchhip District-ah hian nimin thleng khan hri kai 1350 hmuhchhuah an ni tawh a ni.

Nikum June thla a Serchhip District-a hri kai hmuhchhuah an nih atang hian thla 16 hman liam tawhah thla hnih, kumin February leh March thla tihloh ah chuan thla tin hri kai hmuhchhuah an la awm a, thla tin hri kai hmuhchhuah dan chhinchhiahna atanga a lan danin kumin May thla kha thla mal-a hri kai hmuhchhuah tam ber thla niin May thla khan hri kai 339 hmuhchhuah an ni a, tun thla kan hman mek ah hian ni 10 chauh kan la hmangral chungin hri kai mi 293 zet hmuhchhuah an ni tawh bawk a. August thla khan hri kai 190 hmuhchhuah ni bawkin heng thla te hi hri kai hmuhchhuah an tam zual thla a ni a, July thla ah 144 leh April thla khan hri kai 114 hmuh an ni bawk. Serchhip District-ah hian COVID-19 hri kai hmuhchhuah an nih hnuah September 6 kha ni khat-a hri kai hmuhchhuah tam ber ni niin hri kai 77 hmuh an ni a, April 27 khan hri kai 64 hmuh niin May 7 khan hri kai 59 hmuh an ni bawk a ni.

Comments

Chhiar Hlawhte