Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

IWRD Division pali te hnenah Lui tui luangzat tehna hmanrua chi hrang hrang pekchhuah a ni

Irrigation & Water Resources Department Minister, C. Lalrinsanga chuan National Hydrology Project hnuaia Lui tui luangzat tehna hmanrua chi hrang hrang te chu Aizawl, Lunglei, Champhai leh Kolasib Division-a hman turin nimin khan a pechhuak.

IWRD Committee Room-a River discharge measuring equipments- Acoustic Doppler Current Profiler, Acoustic Doppler Velocitimeter, Current meter leh a khaihhnawih dangte hlanna hunah hian C. Lalrinsanga chuan khawvel sik leh sa lo danglam zelah ‘tui’ pawimawhna a lo lang zel tih sawiin, Agriculture, Horticulture, Industry leh thildang hmasawnna kawng zawhna hrang hrangah tuihna (water resource) a that loh chuan thui tak a kal theihloh thu a sawi a. National Hydrology Project-in a tum ber chu ruahtui tla zat, kan tui neih- Lui, Dil, Tuikhuah, Ground Water kan neih zat (quantity leh quality) te rintlak zawk leh changtlung zawk data leh information neih theih hi a ni, a ti a. Lei chhunga tui inkhawl hnem leh recharge dan zirchian te, run-off engzat nge awm tih te leh ruahtui engzatnge kan dawn tih te zirchianna neih a, kumtluana kan lui tui luang zat hriat chianna chuan kawng chi hrang hrang a rahbi rah theihna tur, finna leh remhriatna kengtu tur a ni dawn a ni, a ti a. Mizoram a Water bodies leh tuihna te hi sawrkar chuan awmze nei zawk leh kalphung tha zawka a kalpui theihnan Mizoram Water Resources Regulations & Management Bill chu peihfel tep a nih thu a sawi bawk.

IWRD chuan National Hydrology Project hnuaiah heng hmanraw lei nan hian cheng nuai 184.12 a seng a. Kum 2019 leh 2020 khan Mizoram chu India rama National Hydrology Project kalpui tha ber a ni a, kum 2021-ah hian pahnihna a ni thung a ni. He project hnuaiah hian Lui 16 measurement lak a ni ang a, Rain Gauge hmun 31-ah dah a ni bawk a, tuilian leh khawkheng in chhiatna a thlen tam tak venna kawngah leh Water Resources kaihhnawih project chi hrang hrang siam nan a pawimawh dawn a ni. Ecology zirna a pawimawh em em E-flow chhut nan te, lui-a nungchate dam khawchhuahna tur engtik lai pawh a a luan reng theihna tura data leh information khaikhawmtu project a ni bawk a ni.

Comments

Chhiar Hlawhte