Latest News

India Formosa Foundation ten RT-PCR Mobile Van an pek tur ngaihven zui lo-ah Health Minister puh

ZPM Legislature Party Leader Lalduhoma chuan India Formosa Foundation President in RT-PCR Mobile Van a thlawna pek an duh thu Mizoram sawrkar hnena a thlen chu Health Minister in a ngaihven zui ta miahlo nia sawiin, “Hei hi sual lian tak (Crime) a tlingin kan hria a ni,” a ti.

Nimin-a Aizawl Press Club-a thuthar thehdarhtute a kawmna ah ZPM Legislature Party Leader, Lalduhoma chuan DDK-in India Formosa Foundation President an kawmna ah RT-PCR Mobile Van a thlawna pek an duh thu kan Sawrkar hnenah an thlen tih an lo ngaihthlak thu sawiin, Mizoram in RT-PCR Laboratory pakhat chauh kan neih avang leh kan mamawhna a san em avangin kha thu khan an beng a verh in an ngaihven zui tih a sawi a. “He RT-PCR Mobile Van hi ‘My Lab’ tia hriat a ni a, a man pawh cheng vbc. 2 lai a ni. Mi pahnih thum lekin operate theih niin, darkar 12 chhungin Sample sangkhat lai a test thei a. He khawl kal thei hi kan neih chuan hri vei tamna laite chu a hmunah kal chilhin, Sample lain a test nghal zung zung thei dawn a ni,” a ti.

Lalduhoma chuan India Formosa Foundation in ‘My Lab’ pek an duh thu hi June 14, 2021 khan Health Minister hnenah thlenin, Health Secretary leh Director HME te pawh an awm ve nia hriat a ni tih a sawi a, “Kan lo nghahhlel tehlul nen, thla 3 lai a ral hnuah pawh Health Minister hian a ngaihven zui ta miah lo va, hei hi sual lian tak (Crime) a tlingin kan hria a ni,” a ti a. “Hetia uksak zui a nih tak lohah chuan India Formosa Foundation pawh hian kan mamawh lovah an ngai tawh mai thei a ni. Chu bakah, India ramah hrivei an lo tlakhniam tak viau avang hian min pek pawh hi tul an lo ti tawh lo mai thei bawk. Lawm tak leh rang taka lo dawnsawn tak aruanga hei chen ngaihthah a nih tak avang hian kan chan hlen mai ang tih pawh a hlauhthawnawm ta hle a ni,” a ti.

ZLP Leader chuan Hripui a lo len tirh ah sawrkar chu RT-PCR khawl pek a duh thu a lo thlen tawh thu leh an duhloh thu pawh sawiin, Zodintluanga pek pawh hmang duh lovin High Court-ah zualko hial a tul ta bawk tih a sawi a, “Thilpek dawn lamah an mawng a rih viau laiin, thil lei tur lamah erawh duh aiin an tuanrang mah mah thung a. Kan Sawrkar hian do hi a ngah lutuk a, COVID-19 do bawk, RT-PCR khawl do bawk, Opposition Party te do bawk, do nei reng reng leh titau chungin min enkawl a ni ber mai,” a ti a ni.

Comments

Chhiar Hlawhte