Health Department in thilpek a hnar ngailo - MNF

MNF Party chuan Mizoram sawrkara Health Department in duhsaktute thilpek a hnar ngai lo tih an sawi.

Zirtawpni a thuchhuah an siam ah he thu hi tarlangin MNF Party chuan ZPM Legislature Party Leader, Lalduhoma’n Health Department hmalakna chungchangah thudiklo a sawi chu pawi an tih thu an sawi a. India Formosa Foundation emaw, hmun dang reng reng atangin Mizoram sawrkara Health Department chuan duhsaktute thilpek a hnar ngai lo tih sawiin, “RT-PCR Mobile Van hi neih tumin Health Department hian hma a la reng zawk a ni,” an ti.

India Formosa Foundation in Mizoram tana RT-PCR Mobile Van pek an duh thu an thlen chungchang pawh, “Uluk deuhin an ngaihtuah hnuah, Mizoram-a hman ve theih nia an hriat hnuah Chief Minister zahawm tak Pu Zoramthanga pawhin September ni 2, 2021 khan a tul anga hma la turin India Formosa Foundation-ah DO Letter a thawn tawh nghe nghe a ni,” an ti bawk.