Serchhip-ah mipui ten Online hmanga Tui Bill an pek theihna tur hawn a ni ta

Serchhip leh Thenzawl khua-a Tui Connection nei ten Online hmanga PHE Department-a Tui Bill an pek theihna tur, Online Bill Payment chu nimin khan PHE Department a Chief Engineer, Zone-I Er. HC. Lalnunzira MES chuan a hawng.

PHE Serchhip WATSAN Division Office kawt-a Online Bill Payment hawnna hunah hian Er. HC. Lalnunzira MES chuan tunhma lam chuan Tui Bill pe turin Bill pekna Counter-ah kalin hun leh tha senga Bill pek thin a nih thu a sawi a, amaherawh chu Online Bill Payment kalpui a nih hnuah chuan mahni In atangin Phone hmanga Bill pek theih a nih tawh dawn avangin mipuite tan awlsamna tam tak a thlen dawn thu a sawi. PHE Chief Engineer chuan mipui ten Online hmanga Bill an pek theihna tur hian kum 2018 atang khan Smart Water Solution chu Mizoram puma hman tura an lo kalpui tawh thu leh kum 2018 kum laihawl-ah Aizawl-ah chuan an hman tan tawh thu a sawi a. Kumin kumtir thleng khan District 5-ah hman tawh a nih thu leh tun tum a hawn tak nen hian District 7-ah hman theiha an hawn tak thu a sawi a. Mizoram-a District thar pathum ah pawh he ruahmanna hi kalpui tura an buaipui mek thu leh Survey neiin hman ve thuai beisei a nih thu a sawi bawk.

He huna khual Zahawm Er. Lalrammawia, SE, Rural WATSAN Circle chuan khawvel changkanna mil tura Serchhip-a Online Bill Payment kalpui tur chu Serchhip mipuite pawhin banphak tum tura tan an lak a ngai dawn tih sawiin, a ti ve thiamlo te pawhin an thiam theihna turin inzirtir a tul tih a sawi bawk.

Online Bill Payment hawnna hun hi PHE Serchhip WATSAN Division-a Sr. EE, Er. F. Lalsanglura chuan kaihruaiin Online Bill Payment hawn tak chu Serchhip leh Thenzawl-a kalpui tur a ni tih sawiin, Mizoram-a a kalpui har pawl an nihna chhan chu hri leng avanga lockdown-te a lo nih avang leh, inpeih lo lutuka kalpui chu harsatna a tam thin avangin inpeih thawkhat hnuah an kalpui ta chauh tih a sawi bawk.

Nimin-a he hun hmanna ah hian Er. Samuel LR. Ralte, Sr. SDO, Serchhip chuan Online-a Tui bil pek dan a lem nen entirin a sawifiah a, hemi hnu hian kalkhawm ten zawh chian duh an neihte chhang nghalin, Online hmang hian tui bill chu https://phedmizoram.in/billpayment.php atang leh UPI apps hrang hrang atangin pek theih a nih thu a sawi a, Internet Banking leh Debit Card atanga pek chuan Bank lamin Convenience Charge an lak thin thu leh UPI atanga pek chuan Charge dang a awm lo tih a sawi bawk. He hunah hian Joint VC leh VC thenkhat aiawh te, YMA Sub-Hqrs. Serchhip leh Consumers Association aiawh bakah thuthar thehdarhtute telin C. Lalhmingmawia, Accounts Officer chuan lawmthu sawiin hun a khar a ni.