Latest News

School leh BRC rawktute Police ten man nghal

Nizan hmasa khan Serchhip AOC Veng-a Midland M/S leh Block Resource Centre (BRC) te chu rawk niin heng hmun pahnih rawktu a puh te hi nimin khan Serchhip Police te chuan an man nghal.

Thudawn danin Serchhip AOC Veng-a Midland M/S leh a bula BRC te hi nimin zing khan rawk a ni tih hriatchhuah niin Serchhip Police Startion-ah FIR thehluh nghal a ni a, Serchhip Police te chuan chhui zui nghalin heng Office pahnih rawktu-a puh, Zothansanga (20), New Serchhip Venglai leh Vanlalruatkima (23), Ramthlun Veng nia insawi te chu nimin khan Police te chuan an man nghal a ni.

Police te hnena an inpuanna atanga a lan danin heng mi pahnih te hi nizan hmasa dar 1:00 vel khan Midland M/S-ah hian a bang (Tile) tikeh in an lut a, Laptop leh Assesories hrang hrang an lak bakah Thirtiang te lachhuakin hemi hmang hian a bula BRC kawngka kar chhe lehin In chhung nasa taka an suasam bakah Handy Camera leh Computer keyboard an la chhuak bawk a ni. Heng an thil lakchhuah te hi Police te hian an hmukir leh vek bawk a ni. Heng mi pahnih te hi rukruk thubuai siam sak niin Vawiin hian Court-ah hruai an ni ang.

Comments

Popular News (Last 30 Days)