Ram zalenna ni champha urhsun takin Serchhip-ah pawh hman a ni

Ram Zalenna ni champhaphak, India Independence Day vawi 75-na chu nimin khan ramchhung hmun hrang hrangah urhsun taka hman a ni a. Serchhip-ah pawh hri leng karah he ni lawmna hi neih niin Khuallian, Deputy Govt. Chief Whip Lalrintluanga Sailo MLA chuan India Hnam puanzar a pawtparh a ni.

Serchhip DC Office Tual-a India Independence Day lawmna ah hian khuallian Deputy Govt. Chief Whip Lalrintluanga Sailo chuan mipuite zalenna ni chibai bukin ramdang awpna hnuai ata zalenna kan neih theih nana theihtawp chhuahtu ram hruaitu hmasa te leh mahni inphata he ram tana beitu zawng zawngte, nunna hlantute leh kan sipai huaisen te kan hre reng a ni tih a sawi a, “An inpekna man hi a to em em a, chu chu vawng nung reng turin Vawiin-ah hian ka chah duh che u a ni,” a ti. Zalenna kan hmuh hnu hian hmasawnna pawh chak takin kan hmu chho tih sawiin, tunah chuan India ram chu khawvela mipui aiawh thlan te sawrkarna, democracy ram lian ber pakhat niin khawvel economy lian ber te zing ami a lo ni ta hial tih a sawi a. Serchhip District ngei pawhin hmasawnna hmel tam tak a hmuh tawh thu leh kan la hmuh chhoh zel tur thu sawiin, tunhnaia Serchhip District in hmasawnna a hmuh tlangpui te a tarlang bawk a ni.

Khuallian chuan COVID-19 hri leng karah hnathawktu indaihlohna awm thin mah se Serchhip Bawrhsap Office-a thawktu ten mipui vantlang him nan anmahni hmazawn-a tihtur awm apiang chu an hlenchhuak ve zel thei tih sawiin, lawmawm a tih thu a sawi a. Sawrkar sum piah lamah Company hrang hrang atangin hri leng dona hmanrua an dapkhawm thu a sawi a. Sawrkar laipui-a Ministry of Tribal Affairs hnuaia Support to TRIS Scheme atangin District Administration chuan Project pahnih an kalpui tan mek thu leh Serchhip District chhunga Horticulture hmasawnna atan tangkai tak ni tur leh Handloom-a eizawngte hmasawn nana tangkai tak ni tura duan a nih thu a sawi bawk.

Deputy Govt. Chief Whip chuan Ser-chhip District Police te chuan fak tlaka hna an thawh thu sawiin, Police te thuamthat hna pawh sawrkar cuhan a theih ang anga a kalpui ve zel thu te, Rural Develoment Department hnuaiah hmasawnna hna hrang hrang thawh a nih thu te, Fire & Emergency Services, Serchhip Station pawhin tunhnaiah In kang 2 leh ramkang hmun 39 thelh hna thawkin, Assam Rifles te pawhin ruihhlo leh thildang tawlhruk engemaw zat an man thu te a sawi.

Hriselna chu mihring rohlu, hmasawnna kan neih theihna atana kan mamawh hmasa a nih avangin sawrkar pawhin a ngai pawimawh tih khuallian chuan sawiin, kan chaw pui ber Buhfai chhekkhawl hna pawh kan District-ah tha taka kalpui a nih thu a sawi a. Thingtlang kilkhawr deuh te tan December thla thleng daih tur kudam-ah dah a nih tawh thu a sawi bawk.

PMAY (Urban) hnuaiah chhungkaw 404 te chu In sak tanpuina pein an zinga chhungkaw 309 ten In thar an neih tawh thu pawh khuallian chuan a sawi a, Jal Jeevan Mission hnuaiah Ser-chhip District-a khaw 17-ah Functional Household Tap Connection pek an nih tawh thu pawh sawiin, P&E Department hnuaiah Bukpui to Khawzawl 132kV Line siam hna zaa 99 zawh a nih tawh thu a sawi bawk.

Heng bakah hian District Industries Centre hmalakna te, Sericulture Department, AH&Vety Department, Land Resources, Soil & Water Conservation Department, Irrigation & Water Resources Department, Horticulture Department, Fisheries Department, Agriculture Department, Taxation Department, LAD, Social Welfare Department, Education Department leh Department hrang hrangte hmalakna leh hlawhtlinna te pawh he hunah hian a tarlang bawk a ni.