Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Sangha khawitute tan Web portal leh Mobile app thar, 'Fish-info Mizoram' tlangzarh a ni

Tunlai khawvel changkanna hmanga mipuiten awlsam zawka Fisheries Department an dawr zung zung theihna tur Web Portal leh mobile apps thar, 'Fish-info Mizoram' tih chu nimin khan Fisheries Minister, K. Lalrinliana chuan a tlangzarh.

Aizawl-a Fisheries Conference Hall-a 'Fish-info Mizoram' tlangzarhna hunah hian Fisheries Minister chuan Department in remhre taka tunlai thiamna hman tangkai dan an ngaihtuah chu lawmawm a tih thu sawiin, Sangha khawina kawngah hmasawnna rahbi a thlen ngei a beisei tih a sawi a. Mobile App chu Sangha khawitute leh Department tan thil tha tak, tunlai thiamna hman tangkaina anih mai piah bakah Department in Sangha Dil a endikna kawngah pawh hmanraw tangkai tak leh sum hum theihna a keng tel nia a hriat thu a sawi.

Minister chuan kum engemaw zat kalta atang khan mipuiin Sangha khawi leh Dil siam chu a hlawkna an hre chho mek tih sawiin, Sangha khawitu leh Dil siamtu te pawh an pung chho niin a sawi a. Mizorama kan Sangha mamawh intodelh thei turin Sawrkarin a thei ang angin hma a la mek tih sawiin, hemi atan hian Sangha chi-a intodelh a pawimawh thu leh amaherawh chu a chi hi kan la tharchhuah tlem avangin Sangha note awpkeu-na (hatchery) lamah tan a la a, mimal hatchery siam pawh an awm mek a ni, a ti a. Department chuan Mizoram-a luidunga Sangha kan neih ang Nghaphu sen, Lengphar leh adangte chu Dil a khawi chi a ni em tih a zirchiang mek tih a sawi bawk.

'Fish-info Mizoram' mobile apps atang hian Sangha khawitu, Sangha man a eizawng leh Luidung humhalhtu pawl ten Department-ah Registration an ti thei tawh dawn a, an dilna approve anih hnuah Identity Card an download nghal thei dawn bawk a ni. Registration ti te hi an hmunhma chanchin (Geographical information) kimchang record vek a ni anga, Sangha Dil awmna leh Luidung humhalh te pawh mumal taka record leh mapping tih vek ni tawh dawn a, Fisheries Database mumal tak Department chuan a nei thei tawh dawn a ni. Mobile application atang hian Sangha khawitu leh Sangha mantuten an Sangha tharchhuah leh man te an report zung zung thei tawh dawn bawk a, kumtin Mizoram Sangha tharchhuah pawh mumal zawka chhinchhiah theih beisei a ni a. He Mobile apps hi Playstore atanga download theih tura dah nghal a ni.

Fish Info Portal hi Department Website 'fisheries.mizoram.gov.in' nen link a ni anga, Department lam atangin hriattur pawimawh leh Sangha khawi chungchanga zirtirna awlsam zawka pekchhuah theih tura ruahman a ni bawk a. Tun dinhmunah chuan 'Fish info Mizoram' hi online registration leh information in pek tawn nan chauh a hman a la ni rih anga. Fisheries hnuaia hamthatna leh tanpuina hrang hrang online-a mipui in an dil theihna turin tihchangtlun chhoh zel a tum bawk.

Comments

Chhiar Hlawhte