Latest News

Sainik School leh Chhingchhip tui lakna hlawhtling taka enchhinna neih a ni

PHE Department in Sainik School leh Chhingchhip tana tui an lakna, Water Supply to Sainik School, Chingchhip enchhina (Trail Run) chu nimin khan hlawhtling taka neih niin Sainik School leh Chhingchhip khaw tan hian Tuikum lui atangin pump chhuah a ni.


Water Supply to Sainik School, Chhingchhip enchhinna puala inkhawm tawi nimin-a Tuikum kam Pump House No.1-a neih hi Er. F. Lalsanglura, Sr. EE, PHE Serchhip WATSAN Division chuan kaihruaiin he hun rawn hmanpuitu PHE Department-a E-in-C, Er. C. Lalremsiama chuan Water Supply to Sainik School, Chhingchhip atan hian May ni 23, 2017-ah Non-Lapsable Central Pool of Resources (NLCPR) sum cheng nuai 787 sanction hmuh a nih thu leh, M/S Excelsior Merchants Pvt. Ltd, Kolkata chuan cheng nuai 777-in June 6, 2018-ah hna thawh bul an tan tih a sawi a, June 6, 2020-ah zawh tura beisei a nih laiin COVID-19 hrileng avangin hun engemawchen hnathawh a khaihlak hnuah tui pump chhuah theih a ni ta chu lawmawm a tih thu a sawi a. An tui lâkna luiah tui a la tam tih sawiin, a tul dan a zirin pipeline dang hmang pawhin tui hi lâk leh a la nih tur thu a sawi bawk.

He tui lakna atan hian Phaisen lui chu Gravity hmangin Tuikum kam-a Water Treatment Plan (tui tihthianghlimna)-ah dahluh a ni a, Tuikum kam-a Pump House No-I atangin Pump House-II, Sainik School-ah pump chho-in, Pump House-II atangin Rinna In tlang, Chhingchhip-ah pump chhoh leh a ni a. Er. C. Lalremsiama, Engineer-in-Chief, PHE Department hian Tuikum kam-a Pump House No. 1 atangin Tui pump khawl tinungin Tui hi hlawhtling taka pump chhuah a ni a, Sainik School-a Pump House No. 2 atangin Er. HC. Lalnunzira, Chief Engineer, Zone-I, PHE Department chuan Chhingchhip-a Rinna In tlang-a Reservoir-ah khawl dang hmangin tui pump chhuah chhinna hi hlawhtling takin a nei zui bawk a ni.

He project-a ruahman a nih dan chuan Sainik School tan hian nitin mi 900 tan tui litre 70 theuh dawng thei tura chhutin nitin pek a ni anga, Chhingchhip mipui mi 2000 tan nitin tui litre 55 theuh dawng tur anga chhûtin nitin pek theih tura ruahman a ni bawk a. Tun dinhmunah Phaisen lui atanga tui an lâk hi Treatment plant-ah darkar khatah 33 cum (litre 33,000) a haw lut thei a, tui pump-na khawl hi darkar khata 37 cum (litre 37,000) pump thei tura duan niin, nitin darkar 8 tui pump hna thawk tura duan a ni.

Tuikum kam-ah hian Tui pump tur dah-khawlna Tuizem litre nuai 1 dawng a awm a, Pump House-II, Sainik School bulah Tuizem litre 40,000 dawng awm bawkin, Pump House-II atanga Chhingchhip-a Tui pump chhuah dahkhawlna tur hi Rinna In tlang-ah Tuizem litre nuai 1.2 siam a ni bawk a, Tuikum atanga Sainik School-a tuizem dahna san zawng hi metre 337 niin, Pump House-II atanga Chhingchhip-a tui dahkhawlna tuizem awmna san zawng hi metre 253 a ni bawk.

Chhingchhip-a Tui pump chhuahna hunah hian Er. Lalrammawia, SE (Rural), Er. Anup Chhetry, SE (Aizawl Circle) leh Serchhipa thuthar lakhawmtu thenkhat an tel a, he hun hman zawh a nih hnu hian PHE Department hotute leh Chhing-chhip khawtlang hruaitute chuan inkawmna neiin, Chhingchhip tana Tui harsatna sutkian dan tur an sawiho nghal a ni.

Comments

Chhiar Hlawhte