Ramchhung hmundangte rualin Serchhip-ah India Republic Day vawi 72-na hman a ni

India Republic Day vawi 72-na chu nimin khan India rampum ah urhsun taka hman niin Serchhip-ah pawh DC Office Tual-ah he Ni pual hian hun hman a ni a, Serchhip District Bawrhsap, Kumar Abhishek IAS chuan India Hnam Puanzar pawtparhin Hnam Puanzar chibai buk a chhenglet a ni.

Serchhip-a India Republic Day lawmna hunah hian District Bawrhsap, Kumar Abhishek chuan India ram mipuiten keimahni siam ngei ram Danpui kan hman tanna champha-ah Serchhip mipuite chibai bukin, mahnia ro inrela, Danpui tha tak kan neih theih nana thawktu ram hruaitu hmasate zahna chibai a buk a. An thawhrim rah sengin tuna thangtharte chu khawvela democracy ram lian ber leh ram thiltithei ber te zinga mi kan lo ni ta a ni, a ti. District Bawrhsap chuan India Danpui min dinsaktute khan inrelbawlna satliah mai min siam sak lo tih sawiin, kan khawtlang hmasawnna tur leh India ram kiltin-a muanna leh hmasawnna a thlen theih nan min lo siam sak tel bawk tih a sawi a, keimahni siam ngei ram danpui kan neih ata India ramin hmasawnna hmel a hmu nasa em em a, Mizoram ngei pawhin nasa takin hma a sawn a, Serchhip District phei chu hmasawnna hmel hmu nasa leh India rampum huap pawha ziak leh chhiara hmasawn berte zinga mi ah kan chhuak ta hial a ni, a ti a. Tunhnai maia District chhunga hmasawnna thar hrang hrang hmuh theihte a tarlang zui a ni.

Kum kalta chhungin mipuite himna leh dan kengkawhtu Police Department ten Serchhip District chhungah thubuai 83 an ziaklut a, an zinga 68 chu Chargesheet in thubuai 25-ah thiamloh chantir ni tawhin Case pending 14 ala awm a, kan Police te inpekna avangin kum 2018 atang tawh khan case tihtawp lailawk (acquittal case) vawikhat mah Serchhip District-ah a la awmlo a. COVID-19 kaihhnawih himna Dan lekkawhna chi hrang hrangah fak tlakin Police ten hna an thawk tih sawiin, Drugs leh ruihhlo dangte tam tak an man thu a sawi bawk.

Bawrhsap chuan hriselna chu mihring rohlu a ni tih sawiin, khua leh tuite hriselna chu hmasawnna bulthut a ni bawk tih a sawi a. Kum kalta chhungin District chhungah naupiang report 952 awmin, an zinga 12 hi an boral a, Infant Mortality Rate (IMR) chu 12.6 a ni. 

COVID-19 dona kawngah nasa taka hmalak a nih thu pawh tarlangin, hri leng avang hian Serchhip District-ah mahni In lama inkhung-hrang mi 1214, Sawrkar hmunhmaa inkhunghrang 2342 leh Community Quarantine Center-a khung mi 208 an awm tawh a. Rapid Antibody Test (RAT) 567, Rapid Antigen Test (RAgT) 2399, RT-PCR 1127 leh TrueNAT Tests 2295 awm tawhin, Serchhip District-ah hian hri kai mi 180 hmuhchhuah an ni tawh a, an zinga mi 178 te chu enkawl dam ni tawhin hri kai enkawllai leh nunna chan mi pakhat ve ve an awm tawh a. COVID-19 dona kawnga tha thawhtu zawng zawng chungah Bawrhsap chuan lawmthu sawiin, an thawhrimna zarah COVID-19 case pawh a tlemin dinhmun tha takah kan ding a ni, a ti a. COVID-19 vaccine, Covishield pawh Dose 450 lai District chhunga pek a nih thu sawiin, COVID-19 dona beihpui thlak a la tawp lova, theihtawp chhuaha kan beih zel a tul takzet a ni, a ti bawk.

Heng bakah hian Bawrhsap chuan sawrkar Department hrang hrangte hmalakna pawh sawiin sawrkar kum kalmek ah MG-NREGA hnuaiah ni 86 atan inhlawhna siam a nih tawh thu te, Jal Jeevan Mission hnuaiah Serchhip District chhunga khaw 17-ah House Tab Connection pek a nih tawh thu te, thla 6 kalta chhungin Serchhip District-ah AH& Vety Department in ran 38,144 an enkawl thu te, National Food Security Mission-Rice kalpui mekah buhfai tharchhuah a pun thu te a sawi a, heng bakah hian hmalakna dang te pawh a tarlang bawk a ni.